საქართველოს პრემიერ-მინისტრმა გიორგი კვირიკაშვილმა მინისტრთა კაბინეტთან შეხვედრის დროს პუშკინის სკვერის მიმდებარედ პარკინგის მშენებლობაზე თქვა, რომ ბიძინა ივანიშვილი "აბსოლუტურად არაკომერციულ" საწყისებზე აშენებს ორჯერ მეტ პარკინგს, ვიდრე ეს სჭირდება სასტუმროს.

კვირიკაშვილი, ასევე, ბოტანიკური ბაღის მიმდებარე ტერიტორიის, თაბორის მთის ლანდშაფტურის ზონის სტატუსის შეცვლას გამოეხმაურა. მისი თქმით, თბილისში ხორციელდება "უპრეცედენტო და ისტორიული" პროექტი:

"საუბარია ბოტანიკური ბაღის მიმდებარე ტერიტორიაზე - სულ რამდენიმე ასეულ კვადრატულ მეტრზე, იმისთვის, რომ ბოტანიკური ბაღიდან წავკისამდე არსებული გახრიოკებული ფერდობები, რომელზეც ამ პროექტის მშენებლობაა გათვალისწინებული, გამწვანდეს და მოირწყას."

პრემიერ-მინისტრის განცხადებით, ნაციონალური მოძრაობის მხრიდან "ტყუილების კასკადი" 2011 წელს დაიწყო და დღემდე გრძელდება. ის თბილისის მერიასთან ენმ-ის აქციას გამოეხმაურა და თქვა, რომ პარტია "ტყუილებით ცდილობს" ყურადღების მიპყრობას:

"მე მათ პოლიტიკოსებსაც ვერ დავარქმევ, რადგან ისინი არიან აშკარად წარსულის პოლიტიკოსები, გაკოტრებული პარტიის და გაკოტრებული ლიდერის მიმდევრები."

კვირიკაშვილის განმარტებით, საუბარია მილიარდ ლარზე მეტ ინვესტიციაზე და დღეს ამ ინვესტიციით ოცი ათასზე მეტი ადამიანი საქმდება:

"ეს ადამიანი, ბიძინა ივანიშვილი არ იმსახურებს იმას, რასაც იღებს. ეს არის უდიდესი უსამართლობა და მინდა ვთქვა, რომ სიმართლე ყოველთვის თავისას გაიტანს. თბილისში კეთდება ისტორიული პროექტი, რომელიც შექმნის მართლაც ანალოგის არმქონე, ყველასათვის ხელმისაწვდომ მწვანე სივრცეს, სასეირნო თუ სარბენი ბილიკებით, რეკრეაციული სივრცით და ჩვენ ამაზე უარი ვთქვათ იმიტომ, რომ ნევროზიანი პოლიტიკოსების აზრი გავითვალისწინოთ, მე ამას არავითარ შემთხვევაში არ დავთანხმდები და ჩვენი გუნდის არც ერთი წევრი ამას არ დათანხმდება."

პანორამა თბილისი საქართველოს ყოფილი პრემიერ-მინისტრისა და ქართული ოცნების დამფუძნებლის, ბიძინა ივანიშვილის ინიციატივით შენდება.

რა მოხდა თბილისის საკრებულოში?

25 მომხრე, 3 წინააღმდეგ - 29 სექტემბერს თბილისის საკრებულომ პანორამა თბილისისთვის პუშკინის სკვერთან 1946 მ2-ის ფართობის მიწის ნაკვეთის სტატუსის შეცვლას მხარი დაუჭირა. პუშკინის სკვერთან, პანორამა თბილისის სასტუმროს მიმდებარედ მიწისქვეშა ავტოსადგომის აშენება იგეგმება. ასევე, სოლოლაკის ქედზე 4677 მ2 ტერიტორიას ლანდშაფტური ზონის სტატუსი შეეცვალა. არსებული ინფორმაციით, თაბორის მთის ტერიტორია პანორამას თბილისის გოლფის მოედანს უნდა შეურთდეს.

სხდომის დაწყებამდე სხდომათა დარბაზში მივიდნენ თბილისის მერობის კანდიდატები ევროპული საქართველოდან - ელენე ხოშტარია და ნაციონალური მოძრაობიდან - ზაალ უდუმაშვილი. საკრებულოს დაცვის თანამშრომლებმა მერობის კანდიდატები და პარტიზანი მებაღე ნატა ფერაძე დარბაზიდან ძალის გამოყენებით გაიყვანეს. საკრებულოს წევრმა, ალეკო ელისაშვილმა სხდომათა დარბაზი პროტესტის ნიშნად დატოვა. პირველ ოქტომბერს მან განაცხადა, რომ თბილისის საკრებულოს ტოვებს.

გუშინ, თბილისის მერიასთან ნაციონალურმა მოძრაობამ პუშკინის სკვერის მიმდებარე ტერიტორიაზე პარკინგის მშენებლობა გააპროტესტა. თბილისის მერობის კანდიდატმა და პარტიის მხარდამჭერებმა გზა გადაკეტეს და მერთან შეხვედრას ითხოვდნენ.