აშშ-ის პრეზიდენტმა, დონალდ ტრამპმა განაცხადა, რომ მზადაა რუსეთის წინააღმდეგ ახალი სანქციების დაწესებისთვის, თუმცა მნიშვნელოვანი გაფრთხილებებით. ჟურნალისტებთან საუბრისას ტრამპმა აღნიშნა, რომ აშშ-ის ქმედება ევროპის ქვეყნებისა და NATO-ს მოკავშირეების მხრიდან უფრო მტკიცე პასუხზე იქნება დამოკიდებული. ამის შეახებ ინფორმაციას უკრაინული მედია ავრცელებს.

"ევროპა ყიდულობს ნავთობს რუსეთისგან. მე არ მინდა, რომ ისინი ნავთობს ყიდულობდნენ...და მათი სანქციები საკმარისად მკაცრი არ არის. მზად ვარ სანქციები დავაწესო, მაგრამ მათ უნდა გაამკაცრონ თავიანთი სანქციები ისეთივე დონეზე, როგორც მე," — თქვა დონალდ ტრამპმა.

ტრამპმა ასევე ისაუბრა ომში ჩართული ორი ქვეყნის ლიდერებს შორის პირდაპირი შეხვედრის შესაძლებლობაზე. ჟურნალისტების კითხვაზე მშვიდობის მოლაპარაკებების პერსპექტივასთან დაკავშირებით, მან თქვა, რომ ზელენსკისა და პუტინის შორის სიძულვილი "გაუგებარია".

"მათ ერთმანეთი იმდენად სძულთ, რომ სუნთქვაც არ შეუძლიათ, — თქვა ტრამპმა და დაამატა, რომ მათი შეხვედრა მხოლოდ მისი ჩარევით იქნება შესაძლებელი — "ვფიქრობ, მთელი საუბარი მე მომიწევს."

მიუხედავად იმისა, რომ შეხვედრა ჯერ არ არის დადასტურებული, ტრამპმა მიანიშნა, რომ მომავალში მოლაპარაკებები მაინც გაიმართება.

"მოლაპარაკებები იქნება. მნიშვნელობა არ აქვს ამას სამიტს დავარქმევთ თუ უბრალოდ შეხვედრას — ალბათ მე მომიწევს ჩართვა. ისინი ერთმანეთთან საუბრის უნარს მოკლებულნი არიან," — განაცხადა ტრამპმა.