მოსამართლე ფიქრია სიქტურაშვილმა ერთიანი ნაციონალური მოძრაობის ერთ-ერთ ლიდერს, ლევან ხაბეიშვილს წინასწარი პატიმრობა შეუფარდა, ხოლო მურთაზ ზოდელავას — 25 000-ლარიანი გირაო.

"რადიო თავისუფლების" ინფორმაციით, ზოდელავა გირაოს გადახდამდე პატიმრობაში რჩება. ხაბეიშვილის ადვოკატები აღმკვეთი ღონისძიების სახით გირაოს გადახდას ან შიდაპატიმრობას ითხოვდნენ, მაგრამ, მოსამართლე სიქტურაშვილმა პროკურატურის შუამდგომლობა დააკმაყოფილა.

სანამ ფიქრია სიქტურაშვილი სასამართლო სხდომას დახურავდა, ხაბეიშვილის ადვოკატმა, გიორგი კონდახიშვილმა მოსამართლის აცილება მოითხოვა. კონდახიშვილის განმარტებით, სუს-მა სიქტურაშვილს მიმართა დაკავების განჩინების საფუძველზე, რომელიც მან დააკმაყოფილა და აჩენს ეჭვს, რომ მას წინასწარ აქვს გადაწყვეტილება მიღებული. სასამართლომ არ დააკმაყოფილა მოსამართლის აცილება.

ცნობისთვის, ფიქრია სიქტურაშვილი ის მოსამართლეა, რომელმაც ნინო დათაშვილზე ფსიქიატრიული შემოწმების ნებართვა გასცა. კონდახიშვილმა ამ გარემოებებზეც ისაუბრა სასამართლო პროცესზე და დასძინა, რომ სიქტურაშვილის მსგავსი სამართლებრივი გადაწყვეტილებები მოწმობს ოპოზიციურად განწყობილი პირების მიმართ დამოკიდებულებაზე.

სასამართლო სხდომა სიქტურაშვილმა მას შემდეგ დახურა, რაც ლევან ხაბეიშვილის სიტყვას ტაშის დაკვრა მოჰყვა დამსწრე საზოგადოებისგან.

"ცივილიზებულ სამყაროს არ ახსოვს სიტყვის, განცხადებების გამო დაკავებული პოლიტიკოსი… თქვენ მოგიტანეს ჩემი პოლიტიკური განცხადება და ხართ ერთადერთი მოსამართლე, ვინც პოლიტიკური განცხადების, დაპირების გამო გაეცით ადამიანის დაკავების ორდერი...

იქნებ მოჩვენებითად მაინც, სხვებს უთხრათ, სასამართლო დამოუკიდებელიაო და საქმე აიცილოთ. ...დაცვის უფლებასაც მართმევთ. ბოდიში ჟარგონისთვის, რომ თურმე არ "გევასებით" და გაეცით ჩემი დაკავების ბრძანება. მომეცით 0,001% მაინც შანსი, რომ არსებობდეს სამართალი," — მიმართა ხაბეიშვილმა მოსამართლეს.

შეგახსენებთ, პროკურატურის განცხადებით, ლევან ხაბეიშვილს ბრალდება საქართველოს სსკ-ის 339-ე მუხლის მეორე ნაწილით და 317-ე მუხლით წარედგინა. 339-ე მუხლის მეორე ნაწილი გულისხმობს, უკანონო ქმედების ჩასადენად მოხელისათვის ქრთამის (ფულის გადაცემის) დაპირებას. 317-ე მუხლი — საქვეყნოდ მოწოდებას სახელმწიფო ხელისუფლების დამხობისაკენ.

სუს-მა ენმ-ის ლიდერი ლევან ხაბეიშვილი საჯარო მოხელისთვის ქრთამის შეთავაზების ბრალდებით დააკავა. უწყება ხაბეიშვილს ერთ-ერთი ტელეკომპანიის ეთერში გაკეთებული განცხადების გამო ედავება, სადაც ოპოზიციური ლიდერი სამართალდამცავებს მმართველი პარტიის მითითებების არ შესრულებისკენ მოუწოდებს და სანაცვლოდ 200 000 დოლარს ჰპირდება.