"ფორმულას" შენობასთან დააკავეს კოალიცია ცვლილებისთვის წევრი და ყოფილი გენერალური პროკურორი მურთაზ ზოდელავაც, რომელიც ერთიანი ნაციონალური მოძრაობის პოლიტიკური საბჭოს თავმჯდომარის, ლევან ხაბეიშვილის დაკავებას შეესწრო. კადრებს სოციალურ ქსელში ტელეკომპანიის თანამშრომელი, ეკა შანიძე ავრცელებს, სადაც ჩანს, რომ მურთაზ ზოდელავა მანქანაში ჩასვეს და წაიყვანეს.

მოგვიანებით სუს-ში გამართულ ბრიფინგზე ითქვა, რომ "ლევან ხაბეიშვილმა დაკავებისთანავე მიაწოდა თავისი მობილური ტელეფონი ზოდელავას, მან კი აღნიშნული ტელეფონის გადამალვის მიზნით, სცადა გაქცევა".

"ლევან ხაბეიშვილის დაკავებისას მასთან ერთად დააკავეს მურთაზ ზოდელავა, რომელსაც ხაბეიშვილმა დაკავებისთანავე მიაწოდა თავისი მობილური ტელეფონი. ზოდელავამ კი აღნიშნული ტელეფონის გადამალვის მიზნით, სცადა გაქცევა, რა დროსაც გაუწია ფიზიკური წინააღმდეგობა ანტიკორუფციული სააგენტოს თანამშრომლებს და იძალადა ერთ-ერთ მათგანზე. მისი ქმედება სისხლის სამართლის კოდექსის 353-ე მუხლით კვალიფიცირდება, რაც 2-დან 5 წლამდე თავისუფლების აღკვეთას ითვალისწინებს", — განაცხადეს სუს-ში.

დაკავებამდე მურთაზ ზოდელავამ განაცხადა:

"ფაქტობრივად, გატაცება იყო ლევანის. ბიძინამ გადაწყვიტა, რომ დააკავოს ყველა ვის მიმართაც ხალხს გააჩნია ნდობა, სიმპათია და ვისაც აქვს უნარი, რომ მობილიზება გაუკეთოს ქართველ ხალხს ეს არის ბიძინა ივანიშვილის გადაწყვეტილება პერსონალურად ბიძინა ივანიშვილის გადაწყვეტილება.

ახლა იმდენი კასკადი არის უკანონობების და აღვირახსნილობის რომ უკვე რომ არაფერზე პასუხი უნდა გავცეთ 4 ოქტომბერს.უნდა შემოვიკრიბოთ ძალ-ღონე და 4 ოქტომბერს უნდა გავცეთ ისეთი პასუხი, რომ ეს ბიჭები ვინც აქ არიან და ჰგონიათ, რომ სულ ჩვენ ვიქნებითო, ვინმე ჟურნალისტს გადაუარეს?! — იქ მიდოდეს ბოდიშის მოსახდელად. ვიღაცა ადვოკატს გადაუარეს?! იქ მიდიოდეს ბოდიშის მოსახდელად. ვინმე პოლიტიკოსი დააკავეს ისე როგორც ახლა ლევან ხაბეიშვილი?! იქ მიდიოდეს ბოდიშის მოსახდელად. არ გამოვა სხვანაირად.

ბიძინა რასაც აქ აკეთებს ამას ჰქვია ჩემი ბოსტანი ხართ, ჩემი ყმები ხართ, ამას გვაწერს ყველგან, შუბლზე, მაისურზე, ამას გვამაგრებს ყველას და ამას სჭირდება პროტესტი ამბოხი მშვიდობიანი რევოლუცია. ამას სჭირდება პასუხის გაცემა," — განაცხადა მურთაზ ზოდელავამ "ფორმულასთან".