თბილისის მერმა კახა კალაძემ ჟურნალისტებთან საუბრისას ეუთო/ოდირის სადამკვირვებლო მისიაზე კომენტარი გააკეთა და აღნიშნა, რომ ესმის რატომ არ დააკვირდება ეუთო/ოდირი არჩევნებს. მისი თქმით, საპარლამენტო არჩევნების შემდეგ ეუთო/ოდირს "გლობალური ომის პარტიის" ძალებმა შეურაცხყოფა მიაყენეს, იმის გამო, რომ მათთვის მისაღები დასკვნა არ დადო და შესაბამისად, ახლა გასაგებია რატომ არ სურთ მათ თვითმმართველობის არჩევნებზე დაკვირვება.

"ეუთო/ოდირთან გუშინაც ვისაუბრე და კიდევ ერთხელ გავიმეორებ, რომ, გულწრფელად ვამბობ, არ გამკვირვებია, რომ უარი განაცხადეს ჩამოსვლასთან დაკავშირებით და ამას აქვს თავისი ახსნა და მიზეზი. თქვენ ხომ გახსოვთ საპარლამენტო არჩევნების შემდეგ, როდესაც მათ საზოგადოებას და ყველას — საერთაშორისო თანამეგობრობას წარუდგინეს დასკვნა არჩევნებთან დაკავშირებით. რა დღეში ჩააგდეს იმის გამო, რომ საქართველოში მათთვის მისაღები, მხედველობაში მაქვს გლობალური ომის პარტიის ძალები, რომლებიც ამ ქვეყანას და ქართველ ხალხს ებრძვიან — რომ მათთვის სასიკეთო შედეგი არ დადგა — როგორ ფეხქვეშ გათელეს, როგორ შეურაცხყოფას აყენებდნენ ეუთო/ოდირს, მის დასკვნას და მის წარმომადგენლებს. იმხელა ზეწოლა, იმხელა მუქარა იყო — არანაირი სურვილი არ აქვთ ჩამოვიდნენ და დააკვირდნენ თვითმმართველობის არჩევნებს, როდესაც არანაირი აუცილებლობა არ არის თვითმმართველობის არჩევნებზე სადამკვირვებლო მისიის ჩამოსვლის. შესაბამისად, ძალიან კარგად მესმის მათი ამ გადაწყვეტილების", — თქვა კახა კალაძემ ჟურნალისტებთან საუბრისას.

ცნობისთვის, ეუთო/ოდირი თვითმმართველობის არჩევნებს არ დააკვირდება. ODIHR-ის განცხადებაში ვკითხულობთ, რომ "გამჭვირვალე და სანდო საარჩევნო მონიტორინგს საფუძვლიანი მზადება სჭირდება", რაც ქართული ოცნების მოკლე ვადაში გაგზავნილი მოწვევის გამო ვერ მოხერხდება.