ოცნების ლიდერს, მამუკა მდინარაძეს ბრიფინგზე ჰკითხეს, ხომ არ შეუცვლია ოცნებას თავისი პოზიცია ადგილობრივ არჩევნებზე ეუთო/ოდირის მოწვევასთან დაკავშირებით.

მდინარაძე აცხადებს, რომ ოცნება "სულერთიას" პოზიციაზეა, მათ "არც იმის პრობლემა აქვს, რომ იყოს ეუთო/ოდირი არცევნებზე, ან არ იყოს. მისივე თქმით, ეუთო/ოდირმა "დიდი სურვილიც არ გამოხატა თავიანთ განცხადებაში და პოზიციაში".

"არა, გადაწყვეტილიც არ გვაქვს. თავად ეუთო/ოდორი ამბობს, რომ დაგვიანდა ყველაფერიო, ჩვენ ამაზე ვფიქრობდით. არც კი და არც არა ჩვენ კატეგორიულად და დაბეჯითებით არ გვითქვამს. რატომღაც მათ ჩვენთვის გასაკვირი პოზიცია გამოამჟღავნეს, დიდი სურვილიც არ გამოხატეს თავიანთ განცხადებაში და პოზიციაში. თუმცა, დაახლოებით ძალიან გულწრფელი რომ ვიყო, "სულერთიას" პოზიციაზე ვარ, დიდად ჩვენ არც იმის პრობლემა გვაქვს, რომ იყოს ან არ იყოს, წარმოუდგენელია, რომ ჩვენ რაიმე პრობლემა გვქონდე სადამკვირვებლო მისიასთან დაკავშირებით. ერთადერთი ჩვენი დათქმა ასეთი იყო, რომ ის მაინც გააკეთოს ოპოზიციამ, ან თქვენ მედიის წარმომადგენლებმა, რომ თქვათ — წინა შეფასება ეუთო/ოდირის მისაღები იყო თუ არა. თქვენ ამბობთ, თქვენი ტელევიზია, ჟურნალისტები, რომ არაფერში არ წერია წინა დასკვნა, თან მეკითხებით, ეუთო/ოდირს იწვევთ თუ არა, თან წინა დასკვნას არ აღიარებთ და ჩვენს ხელისუფლებას არალეგიტიმურს ეძახით", — განაცხადა მდინარაძემ.

13 აგვისტოს ტელეკომპანია ფორმულამ გაავრცელა ინფორმაცია, რომ ეუთო/ოდირს ქართული ოცნების მთავრობისგან არ მიუღია მოწვევა თვითმმართველობის არჩევნებზე დასაკვირვებლად, შესაბამისად, 4 ოქტომბრის არჩევნებს არ დააკვირდებიან.

"ეფექტური სადამკვირვებლო მისიის ორგანიზებისა და დამკვირვებლების განლაგებისთვის დარჩენილი შეზღუდული დროის გათვალისწინებით, ODIHR-ს აღარ შეუძლია ჩაატაროს ყოვლისმომცველი და შინაარსიანი არჩევნების დაკვირვება," — აცხადებენ ეუთო/ოდირში.

ეუთო/ოდირი წუხს მოწვევის არარსებობის გამო, რაც მათივე თქმით, ეწინააღმდეგება წინა პრაქტიკებს, როდესაც მათ 2021, 2017, 2010 და 2006 წლების ადგილობრივი არჩევნების დასაკვირვებლად იწვევდნენ.

"როგორც ეუთო-ს მონაწილე სახელმწიფომ, საქართველომ აიღო ვალდებულება, ჩაატაროს დემოკრატიული არჩევნები საერთაშორისო სტანდარტების შესაბამისად. მიუხედავად იმისა, რომ ODIHR არ აკეთებს კომენტარს იმ არჩევნებზე, რომლებსაც არ აკვირდება, ჩვენ გავაგრძელებთ საქართველოში მიმდინარე მოვლენების მონიტორინგს ჩვენი მანდატით განსაზღვრულ ყველა სფეროში", — აცხადებენ ეუთო/ოდირში.