ნორვეგიულმა Fritt Ord Foundation-მა და ZEIT Stiftung Bucerius-მა თავისუფალი მედიის პრემიის ლაურეატები დაასახელეს. მათ შორისაა პატიმრობაში მყოფი ქართველი ჟურნალისტი, ნეტგაზეთისა და ბათუმელების დამფუძნებელი მზია ამაღლობელი. ამის შესახებ ინფორმაციას ბათუმელები ავრცელებს. როგორც მათ მიერ გავრცელებულ პრესრელიზშია აღნიშნული, პრემია ექვს დამოუკიდებელ მედიასაშუალებასა და ჟურნალისტს გადაეცემა.

"პრემია გადაეცემა ექვს დამოუკიდებელ მედიასაშუალებასა და ჟურნალისტს აღმოსავლეთ და ცენტრალური ევროპიდან, როგორც მათი მამაცი საგამოძიებო ჟურნალისტიკის აღიარება უკიდურესად რთულ პირობებში. რეგიონში ავტორიტარული რეჟიმები აფართოებენ გავლენას, ხოლო წლევანდელი პრემიის ორ ლაურეატს ბოლო პერიოდში რამდენიმე წლით თავისუფლების აღკვეთა მიუსაჯეს პროფესიული საქმიანობის გამო. წლევანდელი პრემიის ლაურეატების მიერ შექმნილმა არაერთმა გამორჩეულმა დოკუმენტურმა ფილმმა — როგორც მოკლე, ასევე სრულმეტრაჟიანმა — ფართო აუდიტორიას მიაღწია", — ნათქვამია ფონდის პრესრელიზში.

Fritt Ord Foundation-ისა და ZEIT Stiftung Bucerius-ის განცხადებაში ხაზგასმულია, რომ მზია ამაღლობელმა "ორი ყველაზე პოპულარული და სანდო" პლატფორმა შექმნა და არაერთხელ დაუპირისპირდა ხელისუფლებას.

"ამ პერიოდში მან შექმნა ორი ყველაზე პოპულარული და სანდო პლატფორმა ქვეყანაში — ბათუმელები და ნეტგაზეთი. ჟურნალისტური საქმიანობის გამო იგი არაერთხელ დაუპირისპირდა ხელისუფლებას. 2025 წელს მას ორი წლით თავისუფლების აღკვეთა მიუსაჯეს, რასაც ადამიანის უფლებათა დამცველი ორგანიზაციები პოლიტიკურად მოტივირებულს უწოდებენ. ის პირველი ქალი ჟურნალისტია, რომელიც საბჭოთა კავშირის დაშლის შემდეგ საქართველოში პოლიტიკურად მოტივირებული ბრალდებით დააპატიმრეს", — ნათქვამია განცხადებაში.

თავისუფალი მედიის წლევანდელი ლაურეატები არიან:

  • მედიაპლატფორმა Gwara Media (უკრაინა)

  • ჟურნალისტი და მედიის დამფუძნებელი მზია ამაღლობელი (საქართველო)

  • საგამოძიებო ონლაინმედია Direkt 36 (უნგრეთი)

  • ფოტოგრაფი და ფოტოჟურნალისტი ალექსანდრა ასტახოვა (რუსეთი)

  • მედია არხი Belarusian Investigative Center (ბელარუსი)

  • ჟურნალისტი ნარგიზ აბსალამოვა (აზერბაიჯანი)

ცნობისთვის, თავისუფალი მედიის კონფერენცია ჰამბურგში, 5 ნოემბერს გაიმართება, ხოლო დაჯილდოების ცერემონია — 6 ნოემბერს. ორივე ღონისძიება "პრესის თავისუფლების კვირეულის" ფარგლებში ჩატარდება.

ასევე, 6 აგვისტოს, ბათუმის საქალაქო სასამართლოში მზია ამაღლობელს 2 წლით თავისუფლების აღკვეთა მიუსაჯეს.

სანქცირებულმა მოსამართლე ნინო სახელაშვილმა ამაღლობელს ბრალდება გადაუკვალიფიცირდა 353-ე მუხლის პირველი ნაწილით, რაც გულისხმობს პოლიციის მუშაკისთვის წინააღმდეგობის გაწევა, საზოგადოებრივი წესრიგის დაცვისთვის ხელის შეშლას. პროკურატურა 6 თვე ამაღლობელს პოლიციელზე თავდასხმას ედავებოდა, რაც 4-დან 7 წლამდე პატიმრობას ითვალისწინებდა.

სისხლის სამართლის კოდექსის 353-ე მუხლის პირველი ნაწილი 2-დან 4 წლამდე თავისუფლების აღკვეთას, შინაპატიმრობას ან ჯარიმის დაწესებას გულისხმობს — სანქცირებულმა მოსამართლემ 7-თვიანი უკანონო პატიმრობის მიუხედავად, ამაღლობელს თავისუფლების აღკვეთა მიუსაჯა.