თბილისში მცხოვრებმა აზერბაიჯანელმა სტუდენტმა, ჯავიდ აჰმედოვმა სოციალურ ქსელში განაცხადა, რომ ის საქართველოს საზღვარზე არ შემოუშვეს. მესაზღვრეებმა მიზეზად გზის გადაკეტვის ბრალდებით დაწესებული ჯარიმის გადაუხდელობა დაუსახელეს.

24 წლის ჯავიდ აჰმედოვი აშშ-ის მთავრობის დაფინანსებით GIPA-ს ჟურნალისტიკის პროგრამაზე სწავლობს. 6 სექტემბერს საქართველოში დაბრუნებულ აჰმედოვს ორ დღეში გერმანიაში ფრენა აქვს, სადაც ის გაცვლითი პროგრამით მიდის.

სტუდენტმა "რადიო თავისუფლებასთან" ინტერვიუში განაცხადა, რომ 24 აგვისტოს საზღვრის დატოვებისას განუცხადეს, რომ მას ჯარიმის გადაუხდელობის მიუხედავად საზღვრის დატოვების პრობლემა არ შეექმნებოდა.

"ვუთხარი, რომ თუ ჯარიმა მაკისრია, არ მინდა ქვეყნის დატოვება-მეთქი, მაგრამ მაინც ჩამირტყეს შტამპი პასპორტში და მითხრეს, რომ შემეძლო, ჯარიმა დაბრუნების შემდეგ გადამეხადა," — ამბობს აჰმედოვი "რადიო თავისუფლებასთან" საუბრისას.

6 სექტემბერს საქართველოში დაბრუნებისას კი მას განუცხადეს, რომ 10 000 ლარის ოდენობის ჯარიმა ჰქონდა დაწესებული და ჯარიმის გადახდის შემთხვევაშიც არ შეუშვებდნენ ქვეყანაში.

"ჯერ მითხრეს, ჯარიმას სრულად თუ გადაიხდი, შეგიშვებთო. ცოტა დრო ვითხოვე, რათა ჩემებს დავკავშირებოდი. შემდეგ, დაახლოებით 30 წუთში, მითხრეს, ჯარიმას თუ გადაიხდი, შეიძლება შეგიშვათო. საბოლოოდ კი მითხრეს, ჯარიმა სრულად რომც გადაიხადო, ქვეყანაში ვერ შეგიშვებთო," — განაცხადა სტუდენტმა.

აჰმედოვმა "რადიო თავისუფლებასთან" საუბრისას ასევე დასძინა, რომ ის აქციაში მონაწილეობას არ იღებდა და ჟურნალისტურ საქმიანობას აწარმოებდა. დოკუმენტში, რომელიც აჰმედოვს საზღვრის კვეთაზე უარის დასასაბუთებლად მისცეს განმარტებაში "სხვა მიზეზი" წერია.