აუდიტის სამსახურის ახალმა ხელმძღვანელმა, ირაკლი მექვაბიშვილმა სამი მოადგილიდან თანამშრომლობა მხოლოდ ნოდარ ჯავახიშვილთან გააგრძელა. ამის შესახებ On.ge-ს აუდიტის სამსახურის უფროსის ყოფილმა პირველმა მოადგილემ, ნინო ლომჯარიამ განუცხადა, რომელიც მანამდე მთავარი აუდიტორიის მოვალეობას ასრულებდა.

ლომჯარია ამბობს, რომ ყოფილმა გენერალურმა აუდიტორმა მუშაობის დროს მას სრული ნდობა და თავისუფლება მიანიჭა.

"ამაყი ვარ იმ მიღწევებით, რასაც ჩემი 10-თვიანი მუშაობის პერიოდში მივაღწიეთ ერთად! მჯერა, რომ ვიმუშავე ყველაზე პროგრესირებად და თანამედროვე საჯარო სამსახურში საქართველოში", - აცხადებს ლომჯარია, რომელსაც აუდიტის სამსახურში დღეს, 2 ოქტომბერს ბოლო სამუშაო დღე აქვს.

On.ge-მ სცადა მოადგილეებთან თანამშრომლობის არ გაგრძელების შესახებ ინფორმაციის აუდიტის სამსახურის პრესსამსახურში გადამოწმება, თუმცა ამ ეტაპზე უშედეგოდ.

ნოდარ ჯავახიშვილი ქართული ოცნების ხელისუფლების დროს ინფრასტრუქტურის მინისტრი იყო, მანამდე კი ამავე პარტიის დამფუძნებლისა და საქართველოს ყოფილი პრემიერ-მინისტრის, ბიძინა ივანიშვილის ქართუ ჯგუფის პრეზიდენტი და ქართუ ბანკის დირექტორი.

საქართველოს მთავარი აუდიტორიც საქართველოს საპარალემტო უმრავლესობა, ქართულმა ოცნებამ აირჩია ხმათა უმრავლესობით 20 სექტემბერს.