მარიამ ჩინჩალაძემ, გერმანიაში სწავლის დასრულების შემდეგ, ოჯახთან ერთად საქართველოში ჩამოსვლა გადაწყვიტა. უკან დიდი გეგმით დაბრუნდა: ქუთაისში სახლისთვის, სადაც დაიბადა და ბავშვობა გაატარა, ახალი სიცოცხლე უნდა დაებრუნებინა და საოჯახო სასტუმრო გაეხსნა.

“ძალიან რთული გზა გამოვიარეთ: ყველაფრის რემონტი, თითოეული ნივთის შეძენა და განახლება ადვილი არ იყო, თუმცა უცვლელი დავტოვეთ ძველი სახლის სული და ისტორია, რათა სტუმრებს ყოველთვის გაუჩნდეთ ინტერესი — რა ისტორია ინახება ამ კედლებს მიღმა. ასე დაიბადა Memory Basket — ადგილი, სადაც მოგონებები ინახება”, — იხსენებს მარიამ ჩინჩალაძე.

მარიამის გამოცდილება მეწარმე ქალთა განვითარების პროგრამაში

მარიამმა ახლახან საქართველოს ბანკის “მეწარმე ქალთა განვითარების პროგრამაში” მონაწილეობა მიიღო და საკუთარი სასტუმროს უფრო ეფექტიანად სამართავად ახალი უნარები შეიძინა. პროგრამა აგვისტოში, გაეროს განვითარების პროგრამასთან (UNDP) ერთად, შვედეთის მთავრობის მხარდაჭერითა და EFSE Entrepreneurship Academy-ის ჩართულობით განხორციელდა.

“როგორც კი პროგრამის შესახებ შევიტყვე, გავაცნობიერე, რომ ეს იყო შესაძლებლობა, რომელიც ხელიდან არ უნდა გამეშვა. ჩემი მთავარი მოტივაცია სწავლის გაგრძელება და ბიზნესის სწორად განვითარებისთვის გზების პოვნა იყო. ვიცოდი, რომ ცოდნა მჭირდებოდა, განსაკუთრებით – ციფრული სამყაროს ათვისებაში”, — ამბობს მარიამი.

Memory Basket-ის დამფუძნებელი ამბობს, რომ პროგრამიდან ბევრად მეტი მიიღო, ვიდრე ელოდა.

“საოცარი ადამიანები გავიცანი, უამრავი გამოცდილება გავუზიარეთ ერთმანეთს და მივიღე პრაქტიკული ცოდნა, რომელიც პირდაპირ ჩემს საქმეში გამოვიყენე. პროგრამამ დამანახა, რამდენად მნიშვნელოვანია ტურიზმის სფეროში AI-ს სწორი გამოყენება. თუ აქამდე სოციალურ ქსელებში ბიზნესის აქტივობებზე მხოლოდ ზედაპირული ცოდნა მქონდა, ახლა ზუსტად ვიცი, საიდან დავიწყო და როგორ გამოვაჩინო ჩემი ბრენდი ონლაინ სივრცეში, ახლა მაქვს კონკრეტული ხედვა, როგორ მივაღწიო სამიზნე აუდიტორიამდე, ამაში კი ხელოვნური ინტელექტი დამეხმარება”, — აღნიშნავს იგი."

როგორია ადგილი, სადაც “მოგონებები ინახება”

უკვე მეორე წელია, მარიამის ყოველი დილა სტუმრებისთვის განსაკუთრებული განწყობის შექმნით იწყება. “ჩემი ყველაზე საყვარელი რიტუალია სტუმრებისთვის სახლში მომზადებული მურაბების, ჩვენი ოჯახის თაფლისა და კომპოტის მირთმევაა“.

ეს ატმოსფერო სტუმრებს ყურადღების მიღმა არ რჩებათ. როგორც დამფუძნებელი ამბობს, ბევრჯერ უთქვამთ მისთვის, რომ სახლის ფასადი სასტუმროს არ ჰგავს, შიგნით შემოსვლისას კი სითბო, ღიმილი და სიმყუდროვე პირველივე წამიდან იგრძნობა.

Memory Basket-ს უკვე ჰყავს ლოიალური სტუმრები, საუკეთესო შეფასებები ყველა ონლაინ პლატფორმაზე და ჯილდოებიც კი, თუმცა ადგილობრივ ბაზარზე ჯერ კიდევ ნაკლებად იცნობენ. სწორედ ამიტომ, მარიამის მიზანი სასტუმროს გაფართოებაა.

“მოკლევადიან პერსპექტივაში ჩემი მიზანია, რომ Memory Basket როგორც საერთაშორისო, ისე ადგილობრივ ბაზარზე უფრო ცნობადი გახდეს. გრძელვადიან პერსპექტივაში კი მინდა, სასტუმრო გაფართოვდეს და ტურისტებისთვის ერთ-ერთ გამორჩეულ ადგილად იქცეს.

რაც შეეხება მეწარმე ქალთა პროგამას, აქ მიღებულ ცოდნას აუცილებლად გამოვიყენებ კონტენტის შექმნისა და მარკეტინგის განვითარებისთვის. ვიცი, რომ ეს არის გზა, რომელიც ჩვენს ბრენდს წარმატების ახალ საფეხურზე გადაიყვანს. მჯერა, რომ ჩემი ძალისხმევა გაამართლებს. პროგრამამ კი მაჩვენა, რომ მარტო არ ვარ, ერთად ბევრი რამ შეიძლება უკეთესობისკენ შევცვალოთ”, — დასძენს მარიამ ჩინჩალაძე.

ინფორმაციისთვის, “მეწარმე ქალთა განვითარების პროგრამა” ბენეფიციარებს 360°-იან მხარდაჭერას სთავაზობს პროგრამა ბიზნესის შექმნით ან განვითარებით დაინტერესებული ქალებისთვის ქვეყანაში ერთ-ერთი ყველაზე მასშტაბური და მნიშვნელოვანი ინიციატივაა. იგი ოთხ მთავარ ღირებულებაზე - ცოდნაზე, მხარდაჭერაზე, გამოცდილებასა და თანამშრომლობაზეა დაფუძნებული. მეწარმე ქალთა განვითარების პროგრამა გაეროს განვითარების პროგრამის (UNDP), საქართველოს ბანკი ბიზნესის, შვედეთისა და EFSE Entrepreneurship Academy-ის ხელშეწყობით ხორციელდება.

ამჟამად პროგრამის მე-12 ნაკადზე მიღება გამოცხადდა. პროგრამა ბათუმში 16, 17 და 18 სექტემბერს გაიმართება.

მეწარმე ქალთა განვითარების პროგრამა საქართველოს ბანკის ბიზნეს 360° პლატფორმის ნაწილია. ესაა ინიციატივა, რომელიც საქართველოს ბანკის საგანმანათლებლო ღონისძიებებს, პრაქტიკულ რესურსებსა და სხვა მრავალ აქტივობას აერთიანებს, რაც ბიზნესებს ზრდასა და განვითარებაში უწყობს ხელს.