პარტია გახარია საქართველოსთვის ლიდერმა, გიორგი გახარიამ ტელეკომპანია "პირველის" ეთერში განაცხადა, რომ 2024 წლის საპარლამენტო არჩევნების შემდეგ მანდატებზე უარის თქმა შეცდომა იყო.

გიორგი გახარიამ ისიც თქვა, რომ არ გამორიცხავს, რომ პარტია გახარია საქართველოსთვის გახანგრძლივებული 12 მანდატს გამოიყენებს.

"დღეს, პოლიტიკურ ბოიკოტში არაფერი არ შეცვლილა. ჩვენ უბრალოდ, დღეს, ძალიან აქტიურად ვართ მუნიციპალური არჩევნების პროცესში და ამისთვის არ გვცალია. ამიტომ, გადაწყვეტილება, თუ რაიმე შეიცვალა პოლიტიკურ ბოიკოტთან დაკავშირებით, ამ 12 მანდატთან დაკავშირებით, ამაზე იმსჯელებს პოლიტსაბჭო, დიდი ალბათობით, მუნიციპალური არჩევნების შემდგომ და ეს გადაწყვეტილება, რომელიც იქნება მიღებული, რა თქმა უნდა, იქნება საჯარო.

დღეის მონაცემებით, პოლიტიკურ ბოიკოტთან დაკავშირებით ჩვენ უბრალოდ არ ვცვლით პოზიციას იმიტომ, რომ ამის დრო არ არის. ახლა ყველანი ვართ მუნიციპალური არჩევნების პროცესში და ეს ძალიან მნიშვნელოვანი არჩევნებია თითოეული საქართველოს მოქალაქისთვის და ქვეყნისთვის.
არაფერს არ გამოვრიცხავ. ეს პირდაპირ იქნება დაკავშირებული იმ პოლიტიკურ გარემოსთან, რომელიც იქნება ქვეყანაში მუნიციპალური არჩევნების შემდეგ.

[...] მე არ ვთვლი, რომ ბოიკოტი არის და გამომდინარეობს საპარლამენტო არჩევნების შედეგებიდან...

მე, დღეს, გულწრფელად გეუბნებით, რომ ვთვლი, საპარლამენტო მანდატების არ გამოყენება, ეს იყო შეცდომა. ჩვენ, ამ შეცდომის გამოსწორების პატარა რესურსი გვაქვს დარჩენილი, შევძლებთ ამის გამოყენებას, თუ ვერ შევძლებთ, ეს პირდაპირ იქნება დამოკიდებული იმ პოლიტიკურ გარემოსთან, რომელიც შეიქმნება ქვეყანაში მუნიციპალური არჩევნების შემდეგ', — განაცხადა გიორგი გახარიამ ტელეკომპანია "პირველთან".

ცნობისთვის, ოცნების ყოფილმა პრემიერმინისტრმა გიორგი გახარიამ საქართველო ოცნების პარლამენტის დროებით საგამოძიებო საგამოძიებო კომისიაზე მეორედ დაბარებამდე დატოვა. კომისიის ხელმძღვანელის, თეა წულუკიანის თქმით, როდესაც 21 ივნისს გახარიას მათი წარმომადგენელი დაუკავშირდა, ის საქართველოში აღარ იმყოფებოდა და კომისიას ონლაინ რეჟიმში ჩართვა შესთავაზა. გიორგი გახარია მეორედ 23 ივნისს უნდა გამოკითხულიყო, თუმცა, საბოლოოდ, კომისიის სხდომას 2 ივლისს ონლაინ ჩაერთო.

პირველ სექტემბერს ამავე ეთერში განაცხადა, რომ ოცნებას აქვს საჭიროზე ბევრი რესურსი იმისთვის, რომ მის პოლიტიკური საქმიანობის შეზღუდვაში ბევრად უფრო ეფექტური იყოს მაშინ, როდესაც ის თბილისში იქნება, ამიტომ ჯერ თბილისში დაბრუნებას არ აპირებს.