ახალქალაქის რაიონის სოფელ კუმურდოში ადგილობრივებსა და პოლიციას შორის დაპირისპირების ფაქტზე შინაგან საქმეთა სამინისტრომ გამოძიება დაიწყო. შსს-ის ინფორმაციით, დაპირისპირების შედეგად ოთხი პოლიციელი დაშავდა, ასევე დაზიანდა შსს-ს კუთვნილი რამდენიმე მანქანა.

უწყების მიერ გავრცელებული ინფორმაციით, ადგილობრივი მოსახლეობის ჯგუფმა კულტურული მემკვიდრეობის ძეგლის ტერიტორიაზე შეჭრა სცადა:

"მე-10 საუკუნის ტაძარს, რომლის რესტავრაციაც მიმდინარეობს, შსს-ს დაცვის პოლიცია იცავს. დაცვის პოლიციის თანამშრომლებმა მოქალაქეებს ტაძრის ტერიტორიაზე შეღწევის საშუალება არ მისცეს, რის შემდეგადაც ადგილობრივი მოსახლეობის ნაწილი მათ ფიზიკურად დაუპირისპირდა, ადგილზე მისულ პოლიციას კი ქვები დაუშინეს".

უყების თქმით, გამოძიება სისხლის სამართლის კოდექსის 353-ე პრიმა მუხლით (პოლიციისთვის წინააღმდეგობის გაწევა), 187-ე მუხლის 1-ლი ნაწილით (ნივთის დაზიანება ან განადგურება), სსკ-ს 239-ე მუხლის მე-2 და მე-3 ნაწილებით (ხულიგნობა) მიმდინარეობს.

გუშინ, 30 სექტემბერს, ახალქალაქის რაიონის სოფელ კუმურდოში ადგილობრივი მოსახლეობა კულტურული მემკვიდრეობის სტატუსის მქონე ეკლესიის ეზოში შესვლას აპირებდა. მოსახლეობის თქმით, მათ ეზოში სანთლების დანთება უნდოდათ. ამის საშუალება მათ დაცვის პოლიციამ არ მისცა, რასაც ფიზიკური დაპირისპირება მოჰყვა. ადგილზე ჩასული იყო შს მინისტრი გიორგი მღებრიშვილი. ამ დროისთვის სოფელ კუმურდოში მდგომარეობა სტაბილურია.