მეუღლის, ალინა კალოიანის დამამძიმებელ გარემოებებში ჩადენილი განზრახ მკვლელობის ფაქტზე ბრალდებულმა ნიკოლოზ ქრისტესიაშვილმა სასამართლო პროცესზე ჩვენება მისცა, სადაც თქვა, რომ მისი მცირეწლოვანი შვილები მკვლელობას არ შესწრებიან.

"ერთადერთი არ ვეთანხმები, რომ ბავშვმა ნახა ესო. მას ეძინა, წუთი წუთზე ჩემი ცოლის ძმა უნდა მოსულიყო, აღელვებულ მდგომარეობაში ვიყავი და ვერ დავხვდებოდი მას. დამალვა არ მიცდია, პოლიციას ჩავბარდი," — განაცხადა ბრალდებულმა. [IPN]

მისი განცხადების საპასუხოდ პროკურორმა ლევან ვეფხვაძე თქვა, რომ ეს ფაქტი დადასტურებული რომ იყოს, ბრალშიც იქნებოდა ასახული, ამიტომ ეს საკითხი გამოსაძიებელია.

შეგახსენებთ, გამოძიების ცნობით, 25 აგვისტოს, თბილისში, ზემო ფონიჭალაში, ბრალდებულმა მეუღლეს, განსაკუთრებული სისასტიკით, ბლაგვი საგნით და დანით სხეულის სხვადასხვა არეში მრავლობითი დაზიანებები მიაყენა. მიღებული დაზიანებების შედეგად დაზარალებული ადგილზე გარდაიცვალა.

ნიკოლოზ ქრისტესიაშვილს ბრალდება საქართველოს სისხლის სამართლის კოდექსის 11 პრიმა 109-ე მუხლის "კ" და "მ" ქვეპუნქტებით (განზრახ მკვლელობა, ჩადენილი ოჯახის წევრის მიმართ, განსაკუთრებული სისასტიკით) წარედგინა, რაც სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.