უკრაინის პრეზიდენტმა, ვოლოდიმირ ზელენსკიმ განაცხადა, რომ კვირის ბოლოს დაგეგმილია უკრაინული და ამერიკული გუნდების შეხვედრა, სადაც უკრაინასა და რუსეთს შორის შესაძლო სამომავლო სამშვიდობო მოლაპარაკებებზე მუშაობა იგეგმება. ამის შესახებ ინფორმაციას უკრაინული მედია ავრცელებს.

"დღესაც იქნება შეხვედრა [კელოგთან], რათა გაგრძელდეს ამ თემაზე მუშაობა, მომზადდეს ნიადაგი რუსულ მხარესთან მომავალი შეხვედრის შესაძლებლობისთვის. კვირის ბოლოს შედგება უკრაინული და ამერიკული გუნდის შეხვედრა. შესაბამისად, ის ადამიანები, ვისაც თქვენ ახსენებთ, ან მათი ნაწილი, იქ იქნება," — აღნიშნა ზელენსკიმ, კიევში ნორვეგიის პრემიერმინისტრ იონას გარ სტორესთან ერთობლივ პრესკონფერენციაზე.

პრეზიდენტის თქმით, კვირის განმავლობაში საკმაოდ ბევრი სამუშაო ელოდებათ. გუშინ პრეზიდენტის ოფისის ხელმძღვანელი ანდრეი ერმაკი და აშშ-ის სახელმწიფო მდივანი, მარკო რუბიო და ასევე სხვა პარტნიორები ერთმანეთს დაეკონტაქტნენ.

გარდა ამისა, საგარეო საქმეთა მინისტრი ანდრეი სიბიგა ონლაინ ჩაერთო "დიდი შვიდეულის" (G7) ქვეყნების საგარეო მინისტრების შეხვედრაში, რომელიც უკრაინის დამოუკიდებლობის დღეს გაიმართა. ზელენსკის ინფორმაციით, დღეს ასევე გაიმართება უკრაინის სამხედრო ხელმძღვანელობასა და პარტნიორებს შორის კონსულტაციები, ოთხშაბათს კი — ეროვნული უსაფრთხოების მრჩეველთა შეხვედრა.