"ითხოვენ ისეთი სტატუსის შეჩერებას, რომელიც ჩვენი ხელით გვაქვს შეჩერებული, სამწუხაროდ, სრულ აბსურდშია ევროპული ბიუროკრატია", — ამის შესახებ ოცნების პრემიერმინისტრმა, ირაკლი კობახიძემ ჟურნალისტის კითხვის საპასუხოდ განაცხადა, რომელიც ევროპის საბჭოს საპარლამენტო ასამბლეის 51 დეპუტატის განცხადებას ეხებოდა.

მისი თქმით, "სრულ აბსურდშია ევროპული ბიუროკრატია და აბსურდში არიან შესაბამისი ევროპელი პოლიტიკოსები".

"ისედაც, საკუთარი გადაწყვეტილებით შევიჩერეთ საკუთარი მონაწილეობა ევროსაბჭოს საპარლამენტო ასამბლეის საქმიანობაში. ასეთ პირობებში, თავადაც ხედავთ, რამდენად მძიმე მდგომარეობაშია ევროპული ბიუროკრატია. ითხოვენ ისეთი სტატუსის შეჩერებას, რომელიც ჩვენი ხელით გვაქვს შეჩერებული. სამწუხაროდ, სრულ აბსურდშია ევროპული ბიუროკრატია და აბსურდში არიან შესაბამისი ევროპელი პოლიტიკოსები", — განაცხადა კობახიძემ.

ცნობისათვის, "ევროსაბჭოს საპარლამენტო ასამბლეის (PACE) 51 დეპუტატი (24 სხვადასხვა ქვეყნიდან, გაწევრიანებულები 4 სხვადასხვა პოლიტიკურ ჯგუფში) ავრცელებს წერილობით დეკლარაციას — "ავტოკრატიული უკუსვლა საქართველოში" —- და პირველად ისტორიაში აპირებენ მინისტრთა კომიტეტისთვის მიმართვას საქართველოს ევროსაბჭოდან გასაძევებლად, "თუ საქართველო ავტორიტარული კურსის შეცვლის საკითხში პროგრესს არ მიაღწევს".