გრანტების მართვის სააგენტო ოცნების ინიციატივით "სამოქალაქო საზოგადოების მხარდასაჭერად" მიმდინარე წლის აპრილში შეიქმნა. "ფლანგვის დეტექტორის" ცნობით, სსიპ-მა აპრილში გამარტივებული შესყიდვით შპს "სტარკ პროდაქშენის" მიერ სოციალური ქსელების 3-თვიანი მომსახურება შეიძინა, რაშიც 24 ათასი ლარი გადაიხადა.

დოკუმენტის მიხედვით, მომსახურება მოიცავს "სსიპ — სახელმწიფო გრანტის მართვის სააგენტოს სოციალური მედიის (Facebook, Instagram პლატფორმაზე) გვერდების შექმნას, მართვასა და ვიზუალური მასალის დამზადებას".

ამავე ხელშეკრულების მიხედვით, მომსახურების განხორციელების პერიოდად 2025 წლის 22 ივლისი — 30 სექტემბერი განისაზღვრა.

ბიუჯეტი

22 აპრილს გამოქვეყნებული განკარგულების მიხედვით სსიპ სახელმწიფო გრანტის მართვის სააგენტოსთვის გამოსაყოფ თანხად განისაზღვრა 510,200 ლარი, ხოლო წლიურ შრომის ანაზღაურებად ბიუჯეტის ნახევარი — 253,160 ლარი. ამასთან ერთად, განკარგულებაში მითითებული იყო სააგენტოს თავმჯდომარის, ამ შემთხვევაში თამარ ზოდელავას თვიური ხელფასი — 10,585 ლარი, თავმჯდომარის მოადგილის თვიური ხელფასი — 8,760 ლარი და დეპარტამენტის უფროსის თვიური ანაზღაურება — 7,300 ლარი.

უცნობია თანამშრომელთა ზუსტი რიცხვი, თუმცა კანონპროექტის მიხედვით, სააგენტოში დაახლოებით 10 პირი უნდა დასაქმებულიყო.

კიდევ ერთი, 20 მაისის განკარგულების მიხედვით, სსიპ სახელმწიფო გრანტის მართვის სააგენტოს ბიუჯეტისთვის 510,200 ლარი გამოიყო და ამ თანხის "სამოქალაქო ინიციატივების მხარდაჭერის" პროგრამიდან დახარჯვა განისაზღვრა.

მოგვიანებით დაფინანსება შეიცვალა და უკვე 30 ივნისის განკარგულებით, რომელსაც ხელს ირაკლი კობახიძე აწერს, 20 მაისის განკარგულებაში ცვლილება შევიდა და ოცნების მთავრობამ აღნიშნული სსიპ-თვის ჯამურად 814,472 ლარის ოდენობის თანხის გამოყოფა მოითხოვა, რაც თავიდან დასახელებულ თანხაზე 304,272 ლარით მეტია.

ოცნების პრემიერის 23 აპრილით დათარიღებული ბრძანებით სახელმწიფო გრანტის მართვის სააგენტოს თავმჯდომარე თამარ ზოდელავა გახდა. აღნიშნულ სააგენტოს არასამთავრობო ორგანიზაციებზე გრანტების გაცემის შესაძლებლობა ექნება.

ოცნებამ გრანტების კანონში ცვლილების შეტანას III მოსმენით, 16 აპრილს დაუჭირა მხარა,

ოცნების ხელისუფლების პარლამენტმა "მოქალაქეთა პოლიტიკური გაერთიანებების შესახებ" საქართველოს ორგანულ კანონში ცვლილებები დაჩქარებული წესით, 2 დღეში განიხილა და მესამე მოსმენით, 80 ხმით მხარი დაუჭირა.

ქართული ოცნების საკანონმდებლო ინიციატივა სხდომაზე ფრაქცია ქართული ოცნების თავმჯდომარის პირველმა მოადგილემ ირაკლი კირცხალიამ წარადგინა.

საკანონმდებლო ცვლილების მიხედვით, აკრძალული გრანტის გაცემისა და მიღების მონიტორინგს ანტიკორუფციული ბიურო განახორციელებს.

კანონპროექტის მიხედვით, სახელმწიფო გრანტის მართვის სააგენტოში დაახლოებით 10 პირი დასაქმდება. მთავრობის ადმინისტრაციის მიერ მომზადებული კანონპროექტით წელს გრანტების სააგენტოს ბიუჯეტი 20 მლნ ლარი იქნება. სააგენტოს დაფინანსების წყაროა სახელმწიფო ბიუჯეტი.