"ჩემო მეგობრებო, მათ შეუძლიათ ციხეში ჩაგვსვან, მაგრამ თქვენ ვერ შეგაჩერებენ ცვლილებისთვის ბრძოლაში და ვერ შეაჩერებენ ხალხს, რომ ხმა მისცენ ცვლილებებს. ასე რომ, მთელი ენერგიით იბრძოლეთ და დაარწმუნეთ ყველა, რომ ჩვენ შეგვიძლია დავიბრუნოთ ჩვენი მუნიციპალიტეტები, ქალაქები, ჩვენი სოფლები," — ამის შესახებ კოალიცია ლელო — ძლიერი საქართველოს ლიდერი მამუკა ხაზარაძე რუსთავის ციხის 208-ე საკნიდან ჩაწერილ სატელეფონო კომენტარში საუბრობს.

მისი თქმით, ქართულ ოცნებას ეშინია, რომ 13 წლის შემდეგ, მათ საქართველოს მოქალაქეებისთვის სათქმელი არაფერი აქვთ და ხალხმა ეს ძალიან კარგად იცის.

"ჩვენ, ოქტომბრის ადგილობრივი თვითმმართველობის არჩევნების კამპანიას ვიწყებთ! ძალიან მინდა, რომ თქვენთან ერთად ვიყო, მაგრამ ქართულ ოცნებას ჩვენი ისე ეშინია, რომ ამის უფლებას არ გვაძლევს, ამიტომ მე და ბადრი ციხეში ვართ. რატომ? — იმიტომ, რომ ქართულ ოცნებას ქართველ ხალხთან შეხვედრის ეშინია. ქართულ ოცნებას ეშინია, რომ 13 წლის შემდეგ, მათ ჩვენი მოქალაქეებისთვის სათქმელი არაფერი აქვთ და ხალხმა ეს ძალიან კარგად იცის. მათ ეშინიათ იმ პრობლემების, რომლებიც რეალურად აწუხებს ხალხს. მოქალაქეები, რეალურად ხმას მისცემენ მაღალი ფასების, უმუშევრობის, დაბალი ხელფასების, ავარიული შენობების, საშინელი საცობების, ნარკომანიისა და მიუსაფარი ცხოველების საკითხების მოგვარებას, რაც ახლა ჩვენი ქალაქების ყოველდღიურობად იქცა. რაც მთავარია, ხმას მისცემენ კორუფციისა და რუსული ხელისუფლების წინააღმდეგ. ქართულმა ოცნებამ 2024 წლის საპარლამენტო არჩევნები წააგო. მათ იციან, რომ წელსაც წააგებენ, თუ კამპანიაში ყველა ერთად შევალთ. ჩემო მეგობრებო, მათ შეუძლიათ ციხეში ჩაგვსვან, მაგრამ თქვენ ვერ შეგაჩერებენ ცვლილებისთვის ბრძოლაში და ვერ შეაჩერებენ ხალხს, რომ ხმა მისცენ ცვლილებებს. ასე რომ, მთელი ენერგიით იბრძოლეთ და დაარწმუნეთ ყველა, რომ ჩვენ შეგვიძლია დავიბრუნოთ ჩვენი მუნიციპალიტეტები, ქალაქები, ჩვენი სოფლები. ყოველდღე, ყოველმხრივ, ყველა შესაძლებლობით უნდა დავუპირისპირდეთ ქართულ ოცნებას!" — განაცხადა მამუკა ხაზარაძემ.

გუშინ, 18 აგვისტოს ლელო — ძლიერმა საქართველომ და პარტიამ გახარია საქართველოსთვის თბილისის მერობის ერთობლივ კანდიდატად ძლიერი საქართველოს გენერალური მდივანი, ირაკლი კუპრაძე წარადგინეს. ამის შესახებ რიყის პარკში გამართული ღონისძიებიდან გახდა ცნობილი, სადაც ასევე ითქვა, რომ ოპოზიციურმა პარტიებმა საარჩევნო კამპანია ოფიციალურად გახსნეს.

რაც შეეხება თბილისის საკრებულოს თავმჯდომარეობის კანდიდატს, აღნიშნულ პოსტზე ირაკლი კუპრაძემ პარტია გახარია საქართველოსთვის წევრი — გიორგი შარაშიძე წარადგინა.

თბილისის მერობის ვიცე-მერობის კანდიდატებად კი ლელო — ძლიერი საქართველოს ერთ-ერთი ლიდერი ალეკო ელისაშვილი და გახარია საქართველოსთვის წევრი ტატა ხვედელიანი.