American Eagle-ის სარეკლამო კამპანიამ — რომელშიც მსახიობი სიდნი სვინი მონაწილეობს — ინტერნეტ სივრცეში დიდი აჟიოტაჟი გამოიწვია. ინტერნეტ მომხმარებლების თქმით, კამპანია რასისტულ მესიჯს შეიცავს.

სიდნი სვინი, რომელმაც პოპულარობა სერიალებში — ეიფორია და თეთრი ლოტუსი —მონაწილეობით მოიპოვა, ჯინსის მწარმოებელი კომპანია American Eagle-ის უახლესი შემოდგომის კოლექციის კამპანიაში მიიღო მონაწილეობა. კამპანიის სლოგანია — "სიდნი სვინის შესანიშნავი ჯინსები აქვს".

ეს სლოგანი "შესანიშნავი გენების" სიტყვების თამაშია. ერთ-ერთ ვიდეოში, სვინი საკუთარი პოსტერის წინ დგას, სადაც წერია — "სიდნი სვინის შესანიშნავი გენები აქვს". ფოტოზე სიტყვა "გენები" გადახაზულია და ჩანაცვლებულია — "ჯინსებით".

"გენები მშობლებიდან შთამომავლობაზე გადადის და ხშირად განსაზღვრავს ისეთ თვისებებს, როგორიცაა თმის ფერი, პიროვნება და თვალის ფერიც კი", — ამბობს მსახიობი რეკლამაში — "ჩემი ჯინსები კი ლურჯია".

სიტყვა "გენებზე" აქცენტმა, ხალხში დიდი უკმაყოფილება გამოიწვია. მათი თქმით კამპანია თეთრკანიანების უპირატესობაზე მიუთითებს და "ნაცისტურ პროპაგანდას" ეწევა.

მსახიობის წინააღმდეგ მიმართულ კრიტიკას თეთრი სახლის კომუნიკაციების მენეჯერი, სტივენ ჩუნგიც გამოეხმაურა. მისი თქმით, "გაუქმების კულტურა" უკონტროლო გახდა.

"ეს დამახინჯებული და სულელური ლიბერალური აზროვნება არის მთავარი მიზეზი, რის გამოც ამერიკელებმა 2024 წელს ტრამპი აირჩიეს. ისინი დაიღალნენ ამ სისულელით", — წერს ჩუნგი X-ში.

სვინის წარმომადგენლებმა და კომპანია American Eagle-მა კომენტარის გაკეთებაზე უარი თქვეს.

რაც შეეხება კამპანიას, ის American Eagle-ის ახალი შემოდგომის კოლექციისთვისაა, რომელშიც წარმოდგენილია შეზღუდული რაოდენობის ჯინსის ქურთუკები და "სიდნის ჯინსი", რომელიც მსახიობთან თანამშრომლობით შეიქმნა.

ჯინსებზე გამოსახულია პეპლები, რომლებიც ოჯახში ძალადობის შესახებ ცნობიერების ამაღლებას ეძღვნება. კამპანიის თანახმად, გაყიდვებიდან მიღებული შემოსავლის დიდი ნაწილი გადაირიცხება არაკომერციულ ორგანიზაცია, Crisis Text Line-ში, რომელიც ფსიქიკური ჯანმრთელობის მხარდაჭერის უფასო 24-საათიანი სერვისია.

ინტერნეტ მომხმარებლების ნაწილი ფიქრობს, რომ სარეკლამო კამპანიის კრიტიკა გაზვიადებულია. მათი თქმით, ხალხი ცდილობს ყველაფერს პოლიტიკური ელფერი შესძინონ, ზოგი კი ამ აზრს სრულიად ეწინააღმდეგება.

იხილეთ ფოტოები სიდნი სვინის American Eagle-ის ახალი კამპანიიდან: