ნინო ზაუტაშვილმა და ვასილ ივანოვ-ჩიქოვანმა საზოგადოებრივი მაუწყებლის მიერ მათი სამსახურიდან გათავისუფლება საქალაქო სასამართლოში გაასაჩივრეს. ინფორმაციას მედიაჩეკერი ავრცელებს.

ნინო ზაუტაშვილის თქმით, "შემდეგი ეტაპი იქნება ტელეკომპანია იმედის წინააღმდეგ სარჩელი".

მიმდინარე წლის 11 აპრილს, ვასილ ივანოვ-ჩიქოვანი და ნინო ზაუტაშვილი საზოგადოებრივი მაუწყებლიდან გაათავისუფლეს. ჟურნალისტებმა განაცხადეს, რომ საზოგადოებრივი მაუწყებლის დირექტორმა, თინათინ ბერძენიშვილმა ისინი დაიბარა და სამსახურიდან გათავისუფლების შესახებ აცნობა.

მოგვიანებით კი გადაცემა "რეალური სივრცე" დახურა. "რეალური სივრცის" გუნდმა "პირველი არხის" მენეჯმენტის შეთავაზებაზე — მუშაობა გაეგრძელებინათ რადიოს დილის გადაცემაში, ვებგვერდზე, პრომოუშენის დეპარტამენტსა და მუსიკალურ გადაცემაზე, უარი თქვა. ისინი აცხადებენ, რომ არხის მენეჯმენტს სურს, "გუნდი დანაწევრდეს და მისმა ვერც ერთმა წევრმა ვერ მოახერხოს იმის გაკეთება, რისი კეთების გამოცდილება და კვალიფიკაცია აქვს".