დღეს, სტამბოლში რუსეთსა და უკრაინას შორის მოლაპარაკებების მესამე რაუნდი იმართება, თუმცა როგორც კიევში, ისე მოსკოვში აცხადებენ, რომ მნიშვნელოვანი გარღვევა მოსალოდნელი არ არის.

ამ შეხვედრას წინ 16 მაისისა და 2 ივნისის მოლაპარაკებები უძღოდა, რომლებიც ძირითადად შეზღუდული მასშტაბის ტყვეთა გაცვლითა და დაღუპულების გადაცემაზე შეთანხმებით დასრულდა. ამ მოლაპარაკებებს ფონზე რუსეთის მიერ უკრაინაში განხორციელებული სარაკეტო და უპილოტო საფრენი აპარატებით შეტევები კვლავ აქტიურ ფაზაშია.

დელეგაციები და დღის წესრიგი

ABC News-ის ცნობით, უკრაინის დელეგაციას როსტემ უმეროვი, ეროვნული უსაფრთხოებისა და თავდაცვის საბჭოს მდივანი ხელმძღვანელობ. მასთან ერთად მოლაპარაკებებში მონაწილეობენ უკრაინის დაზვერვისა და საგარეო საქმეთა სამინისტროს წარმომადგენლები, აგრეთვე პრეზიდენტ ზელენსკის ოფისის თანამშრომლები.

რაც შეეხება რუსულ მხარეს, დელეგაციის შემადგენლობა ბოლომდე არ არის დაზუსტებული, თუმცა მედიაში გავრცელებული ცნობებით, შესაძლოა კვლავ ჩაერთოს ვლადიმერ მედინსკი, რომელიც ადრე რუსეთის მხრიდან მოლაპარაკებებს ხელმძღვანელობდა.

Anadolu Agency-ის ცნობით, უკრაინული მხარისთვის მოლაპარაკებების ძირითადი მიზნებია: ტყვეთა გაცვლა, რუსეთში გატაცებული უკრაინელი ბავშვების დაბრუნება და ლიდერთა სამიტის ორგანიზების მიმართულებით წინსვლა. ტერიტორიულ საკითხებზე მსჯელობა კიევის განცხადებით, მხოლოდ ცეცხლის შეწყვეტის შემთხვევაში განიხილება .

კრემლი: "სასწაულებს არ ველით"

მოლაპარაკებების დაწყებამდე, კრემლის წარმომადგენელმა დმიტრი პესკოვმა მკაცრი ტონი შეინარჩუნა და განაცხადა: "ამ მოლაპარაკებებისგან სასწაულებს არ უნდა ველოდოთ". მისი თქმით, პრეზიდენტების პუტინისა და ზელენსკის შეხვედრამდე ჯერ კიდევ ბევრი დიპლომატიური სამუშაოა საჭირო.

საომარი ვითარება კვლავ დაძაბულია. The Guardian-ის ცნობით, გასულ ღამეს რუსეთმა უკრაინის ტერიტორიაზე 40-ზე მეტი დრონით მიიტანა იერიში. რაც მოლაპარაკებებს მეტ დაძაბულობას სძენს და ცეცხლის შეწყვეტის მიმართულებით კონსენსუსის მიღწევის იმედს ამცირებს.

საერთაშორისო ზეწოლა

მოლაპარაკებები იმ დროს იმართება, როდესაც საერთაშორისო საზოგადოება მხარეებს დიალოგისკენ მოუწოდებს. აშშ-ის პრეზიდენტმა დონალდ ტრამპმა რუსეთს 50-დღიანი ცეცხლის შეწყვეტისკენ მოუწოდა, წინააღმდეგ შემთხვევაში მოსკოვს დამატებითი სანქციები და ტარიფები ემუქრება.