ხვალ, 23 ივლისს, თურქეთის ქალაქ სტამბოლში უკრაინისა და რუსეთის დელეგაციებს შორის პირდაპირი მოლაპარაკებების მესამე რაუნდი გაიმართება. უკრაინული მედიის ინფორმაციით, ამის შესახებ 21 ივლისს, უკრაინის პრეზიდენტის, ვოლოდიმირ ზელენსკის მიერ გავრცელებული მიმართვიდან გახდა ცნობილი.

"დღეს მე ეროვნული უშიშროებისა და თავდაცვის საბჭოს მდივანთან რუსტემ უმეროვთან განვიხილე პატიმრების გაცვლის და თურქეთში რუსულ მხარესთან კიდევ ერთი შეხვედრის დაგეგმვა," — განაცხადა ზელენსკიმ.

უმეროვის ცნობით, შეხვედრა ოთხშაბათს არის დაგეგმილი, მეტი დეტალი კი 22 ივლისს გახდება ცნობილი.

21 ივლისს, კრემლის პრესსპიკერმა დიმიტრი პესკოვმა თქვა, რომ მოსკოვი მოლაპარაკებების შემდეგი რაუნდის ჩატარებას მხარს უჭერს, თუმცა მისი თქმით, საბოლოო თარიღი ჯერ არ შეთანხმებულა.

შეგახსენებთ, უკრაინასა და რუსეთს შორის მოლაპარაკებები 3 წლის განმავლობაში იყო შეჩერებული. პირველი რაუნდი კი სტამბოლში 16 მაისს გაიმართა, მაგრამ ვლადიმერ პუტინი შეხვედრაზე არ გამოცხადდა.

რუსეთის პრეზიდენტის ნაცვლად სტამბოლში მისი მთავრობის რამდენიმე წევრი ჩავიდა, რასაც ზელენსკიმ "ბუტაფორიული" უწოდა. მოლაპარაკებების ბოლო რაუნდი კი სტამბოლში 2 ივნისს შედგა.

რაც შეეხება ხვალ, 23 ივლისს დაგეგმილ შეხვედრას პესკოვმა თქვა, რომ დელეგაციაში, რომელსაც პუტინის თანაშემწე, ვლადიმერ მედინსკი ხელმძღვანელობს, "ცვლილებები" არ იქნება. მისი თქმით, რუსეთის მაღალი თანამდებობის პირები, მათ შორის საგარეო საქმეთა მინისტრი სერგეი ლავროვი, შეხვედრაში მონაწილეობას არ მიიღებენ.

26 ივნისს, პრეზიდენტმა რეჯეფ თაიფ ერდოღანმა განაცხადა, რომ თურქეთი მუშაობს ზელენსკი-პუტინის შეხვედრის ორგანიზებაზე, რომელშიც შესაძლოა აშშ-ის პრეზიდენტმა დონალდ ტრამპმაც მიიღოს მონაწილეობა.

ცნობისთვის, უკრაინამ მოლაპარაკებების ორივე რაუნდზე 30-დღიანი, უპირობო ცეცხლის შეწყვეტის შესახებ წინადადება წამოაყენა, რასაც აშშ-ც უჭერს მხარს, თუმცა რუსეთი ამ წინადადებას ჯერჯერობით უარყოფს.