ამერიკის შეერთებული შტატების კონგრესმა 2026 წლისთვის, თავდაცვისთვის 832 მილიარდი დოლარის ოდენობის ბიუჯეტი დაამტკიცა. მიუხედავად იმისა, რომ უკრაინისთვის ახალი დახმარება კანონპროექტში უშუალოდ არ არის გათვალისწინებული, დოკუმენტმა ხაზგასმით აჩვენა, რომ ვაშინგტონი უკრაინის საკითხით დაინტერესებას აგრძელებს. ამის შესახებ ინფორმაციას Kyiv Post ავრცელებს.

ბიუჯეტი თავდაცვის ხარჯებს 2025 წლის მსგავსად ინარჩუნებს და უფრო მეტად საბრძოლო მზადყოფნის უზრუნველყოფაზეა ფოკუსირებული. განსაკუთრებული პრიორიტეტი ჩინეთთან დაპირისპირებას, ტაივანის უსაფრთხოებას და შეიარაღებული ძალების მოდერნიზაციას — მათ შორის, მეხუთე და მეექვსე თაობის სამხედრო ავიაციის განვითარებას ენიჭება.

კანონპროექტში უკრაინისთვის ცალკე დაფინანსება არ არის მითითებული, თუმცა ეს მწვავე დებატების თემა იყო. რესპუბლიკელმა ტეილორ გრინმა კანონპროექტში შესწორება შეიტანა, რომელიც უკრაინაზე მიმართული ნებისმიერი სახის დაფინანსების გამოყენებას კრძალავდა. აღნიშნული ინიციატივა ორპარტიული უმრავლესობით — 353 ხმით 76-ის წინააღმდეგ გაბათილდა.

რესპუბლიკელმა კონგრესმენმა დონ ბეკონმა ეს შედეგი უკრაინის მიმართ აშშ-ის მხარდაჭერის დასტურად მიიჩნია.

"დღეს დილით წარმომადგენელთა პალატამ გადამწყვეტად დაუჭირა მხარი უკრაინის სამხედრო მხარდაჭერას —353-76," — აღნიშნა მან.

კანონპროექტი სოციალურ საკითხებთან დაკავშირებულ კრიტიკის ქარცეცხლში მოყოლილ მუხლებსაც შეიცავს, როგორიცაა სამხედრო კლინიკებში აბორტის აკრძალვა, ტრანსგენდერთა სამედიცინო მომსახურების შეწყვეტა და მრავალფეროვნებისა და თანასწორობის პროგრამების გაუქმება.

გეგმაშია ასევე თავდაცვის სამინისტროს სამოქალაქო შტატიდან დაახლოებით 45 000 ადამიანის გათავისუფლება.

ბიუჯეტი ეს ვერსია წარმომადგენელთა პალატამ დაამტკიცა, მაგრამ საბოლოოდ სენატთან უნდა შეთანხმდეს, სადაც უკრაინის დაფინანსების საკითხი და თავდაცვის პრიორიტეტები შესაძლოა კვლავ განიხილონ.