ევროკავშირმა რუსეთის წინააღმდეგ სანქციების მე-18 პაკეტი 18 ივლისს შეათანხმა, რაც ბლოკის ერთ-ერთი ყველაზე მასშტაბური მცდელობაა, შეაფერხოს მოსკოვის შესაძლებლობა, გააგრძელოს ომი უკრაინის წინააღმდეგ.

ევროკავშირის საგარეო პოლიტიკის ხელმძღვანელმა კაია კალასმა X-ზე დაწერა, რომ სანქციების მე-18 პაკეტი "ერთ-ერთი ყველაზე ძლიერია", რომელიც კრემლს ომის ბიუჯეტს კიდევ უფრო შეუმცირებს.

ევროკომისიის პრეზიდენტმა ურსულა ფონ დერ ლაიენმა განაცხადა, რომ სანქციები "რუსეთის საომარი მანქანის გულს" უტევს.

ევროკავშირის საკანონმდებლო ჟურნალში გამოქვეყნდა ევროკავშირის საბჭოს მიერ ერთი დღით ადრე მიღებული დოკუმენტი, რომელიც მოიცავს იმ რუსული ბანკების, ე.წ. ჩრდილოვანი ფლოტის გემების და ფიზიკურ და იურიდიულ პირების სიას, რომელთაც სანქციები უწესდებათ.

რომელ სექტორებს უწესდებათ სანქციები?

ზომები, რომლებიც რამდენიმე კვირიანი შიდა დებატების შემდეგ დამტკიცდა, ძირითად სექტორებზეა მიმართული, მათ შორის ენერგეტიკაზე, ფინანსებზე, თავდაცვაზე და უკრაინაში შეჭრაში მონაწილე ცალკეულ აქტორებზე. ასევე, დოკუმენტი შეიცავს იმ რუსული ბანკების სიას, რომლებზეც შეზღუდვებია დაწესებული, ე.წ. ჩრდილოვანი ფლოტის გემების სიას, ასევე სანქციების ქვეშ მყოფ ფიზიკურ და იურიდიულ პირებს.

ახალი პაკეტის ცენტრალური კომპონენტი რუსული ნედლი ნავთობის ექსპორტის ფასის ლიმიტია, რომელიც ბარელზე 60 დოლარიდან 47,60 დოლარამდე შემცირდა. ლიმიტი, რომელიც 3 სექტემბერს ამოქმედდება 90-დღიანი გარდამავალი პერიოდით, ახლა დინამიკურია — ავტომატურად რეგულირდება, რათა საშუალო გლობალურ საბაზრო ფასებზე 15%-ით დაბალი დარჩეს.

პარალელურად, ევროკავშირმა მესამე ქვეყნებში გადამუშავებული რუსული ნედლი ნავთობისგან დამზადებული რაფინირებული პროდუქციის იმპორტი აკრძალა, საიდანაც მხოლოდ რამდენიმე დასავლელი მოკავშირე, როგორიცაა აშშ, დიდი ბრიტანეთი და ნორვეგია, გამონაკლისს წარმოადგენს.

მნიშვნელოვანი საკითხი რუსეთის ე.წ. "ჩრდილოვან ფლოტს" — ტანკერების ქსელს ეხება, რომელიც სანქციების გვერდის ავლისთვის გამოიყენება. ევროკავშირმა შავ სიაში კიდევ 105 გემი შეიყვანა, რითაც მათი საერთო რაოდენობა 444-მდე გაიზარდა და სანქციები გააფართოვა. ახლა სანქციები შეეხება გემების მფლობელებს, ოპერატორებს და პირველად, გემის კაპიტნებს და დროშის რეგისტრატორ აგენტებსაც კი. კიდევ ერთი ისტორიული ნაბიჯია ის, რომ ევროკავშირმა Nord Stream 1-თან და 2-თან დაკავშირებული ყველა ტრანზაქცია აკრძალა, რაც რუსეთის გაზის ინფრასტრუქტურიდან სამუდამო მოწყვეტის სიგნალი იყო.

ახალი სანქციების ფარგლებში, ფინანსური სექტორიც გაზრდილი ზეწოლის ქვეშაა.

22 რუსულ ბანკს ახლა ევროკავშირის სუბიექტებთან ტრანზაქციების განხორციელება ეკრძალება. ეს ბანკებია: Ozon bank, T-bank, Bank Saint Petersburg, Bank Centrocredit, Yandex bank, Surgutneftegazbank, Metcombank, Severgazbank, Genbank, Bystrobank, Energotransbank, Tatsotsbank, Bank Zenit, Transstroybank, Bank FINAM, Ekspobank, LOCKO Bank, Bank DOM.RF, SME Bank, LANTA Bank, Bank131, Bank RostFinance

სანქციები გავრცელდა რუსეთის პირდაპირი ინვესტიციების ფონდზე (RDIF) და მის შვილობილ კომპანიებზე. გამკაცრდა ფინანსური შეტყობინებების სერვისებზე შეზღუდვები, დაგეგმილია კრიპტოაქტივების პლატფორმებზე დამატებითი ზედამხედველობა, რაც აქამდე სანქციების გვერდის ავლას უწყობდა ხელს.

სამხედრო-სამრეწველო კომპლექსის სანქციები ახლა 3 ჩინურ და 8 ბელორუსულ კომპანიას მოიცავს, რომლებიც რუსეთს იარაღით ამარაგებენ.

ექსპორტის აკრძალვების სია 26 ახალი სუბიექტით გაფართოვდა — ძირითადად ჩინეთიდან, ჰონგ-კონგიდან და თურქეთიდან — რომლებიც ორმაგი დანიშნულების ტექნოლოგიებზე წვდომას ბლოკავდნენ, როგორიცაა უპილოტო საფრენი აპარატების ნაწილები, ზუსტი ხელსაწყოები და ქიმიური საწვავი.

ვის უწესდება სანქციები?

სანქციების პაკეტს 55-პირიანი სია აქვს, მათ შორის 14 ფიზიკური და 41 იურიდიული პირი დაემატა. მათ შორის არიან ის პირები, რომლებიც ჩართულნი არიან პროპაგანდაში, ლოჯისტიკასა და უკრაინაში რუსეთის ოკუპაციის აღსრულებაში. სანქციები ასევე გავრცელდა ბელორუსზე, სადაც რვა სამხედრო კომპანია იქნა მიზანში ამოღებული და ახალი შეზღუდვები დაწესდა შეიარაღებაზე.

სანქციების ქვეშ მყოფ პირთა სიაში შედიან "მოსფილმის" გენერალური დირექტორი, რეჟისორი და პოლიტიკური ტოქ-შოუების მონაწილე კარენ შახნაზაროვი, ვერნადსკის სახელობის ყირიმის უნივერსიტეტის რექტორი ვლადიმერ კურიანოვი, ტერიტორიული განვითარების ფონდის ყოფილი ხელმძღვანელი ილშატ შაგიახმეტოვი, სამხედრო-სამრეწველო კომპლექსთან დაკავშირებული არაერთი მეწარმე და მენეჯერი და რამდენიმე უცხო ქვეყნის მოქალაქე.

Reuters-ის ცნობით, მიუხედავად იმისა, რომ საბერძნეთმა, კვიპროსმა და სლოვაკეთმა ნავთობის ლიმიტის შემცირებას თავდაპირველად წინააღმდეგობა გაუწიეს, საბოლოო შეთანხმებას მას შემდეგ მიაღწიეს, რაც სლოვაკეთმა ენერგიის იმპორტთან დაკავშირებული გარანტიები მიიღო. კრემლის პრესსპიკერმა დიმიტრი პესკოვმა სანქციების დაწესებას უპასუხა და ეს ნაბიჯი "არაეფექტურად" შეაფასა, ხოლო რუსეთის ყოფილმა პრეზიდენტი დიმიტრი მედვედევი დაიმუქრა, რომ საპასუხოდ უკრაინაზე თავდასხმებს ესკალაციას მოახდენდა.