პარტია გახარია საქართველოსთვის ლიდერის, გიორგი გახარიას ადვოკატის და პარტიის აღმასრულებელი მდივნის, ბერდია სიჭინავას განცხადებით, ე.წ. ჩორჩანას საქმეზე "დოკუმენტებზე დაფუძნებულ მტკიცებულებებზე დაყრდნობით ვამტკიცებთ გიორგი გახარიას უდანაშაულობას".

როგორც ადვოკატი განმარტავს, დაცვის მხარემ დოკუმენტური მტკიცებულებებით დაიწყო, რადგან ბრალდების მხარეს მხოლოდ სუბიექტურად დაინტერესებული პოლიტიკური აქტორები მოჰყავს შეკვეთილი განცხადებებით.

"სიმბოლურად, დოკუმენტური მტკიცებულებებით დავიწყეთ, რადგან ბრალდების მხარეს მხოლოდ სუბიექტურად დაინტერესებული პოლიტიკური აქტორები მოჰყავს აქ შეკვეთილი განცხადებებით. შესაბამისად, ჩვენ დოკუმენტებზე დაფუძნებული მტკიცებულებების დაყრდნობით ვამტკიცებთ გიორგი გახარიას უდანაშაულობას", — თქვა ბერდია სიჭინავამ.

ბერდია სიჭინავას განცხადებით, წარმოდგენილი და დადასტურებულია, თუ რა იყო 2019 წელს სახელმწიფოს პოზიცია.

"წარმოვადგინეთ და დავადასტურეთ, რა იყო 2019 წელს სახელმწიფოს პოზიცია. სახელმწიფო უსაფრთხოების სამსახური პირდაპირ წერდა თავის ანგარიშში, რომელიც 2020 წელს მიღებული აქვს პარლამენტს, ყველა კომიტეტს ამასთან დაკავშირებით დადებითი დასკვნა აქვს გაცემული და ამ ანგარიშისთვის 87 დეპუტატს აქვს მხარი დაჭერილი. აქ წერია, რომ 2019 წლის იანვრიდან მოყოლებული ევროკავშირი სახელმწიფო უსაფრთხოების სამსახურთან ერთად აფიქსირებდა მონიშვნებს ჩორჩანის ტყეში, რაც პირდაპირ მიანიშნებდა ტერიტორიულ პრეტენზიებზე სამხრეთ ოსეთის დე-ფაქტო, თვითგამოცხადებული რუსული საოკუპაციო რეჟიმის წარმომადგენლების ინტერესებს კონკრეტულად, ჩორჩანას ტერიტორიასთან დაკავშირებით", — განაცხადა მან.

ადვოკატის თქმით, მსგავსი ჩანაწერები ფიქსირდება 2021 და 2024 წლების ანგარიშებშიც, რომლებიც სასამართლო პროცესზე გამოიკვლიეს.

"იგივე წერია 2021 წლის და 2024 წლის ანგარიშში, ყველა ეს ანგარიში დღევანდელ სასამართლო პროცესზე გამოკვლეული იქნა, ყველა ეს დოკუმენტი, რომელიც პარლამენტმა ამ დასკვნებთან დაკავშირებით მიიღო, გამოკვლეული იქნა. ამასთან, ყველა იმ პარლამენტარის გვარი და სახელი იქნა წაკითხული, რომლებმაც ამ ანგარიშებს დაუჭირა მხარი, დღეს რომ რაღაცებს სხვანაირად საუბრობენ", — განაცხადა ბერდია სიჭინავამ.

როგორც ბერდია სიჭინავა აღნიშნავს, შსს-სა და სუს-ის მხრიდან დარღვეულია გიორგი გახარიას კონსტიტუციური უფლება, რადგან მათ დაცვის მხარეს მტკიცებულებების მოპოვების შესაძლებლობა შეუზღუდეს. ადვოკატის განცხადებით, სახალხო დამცველმა კონკრეტულ შემთხვევაში დაადგინა დარღვევა და უწყებებს რეკომენდაციით მიმართა, თუმცა ის არ შესრულდა.

"დღეს, სასამართლო პროცესზე წარმოვადგინეთ, რომ შინაგან საქმეთა სამინისტროს და სახელმწიფო უსაფრთხოების სამსახურის მხრიდან დარღვეულია დაცვის კონსტიტუციური უფლება გიორგი გახარიასთან მიმართებით, რომლებმაც დაცვის მხარეს მტკიცებულებების მოპოვების შესაძლებლობა შეუზღუდეს.

ასევე, სახალხო დამცველმა კონკრეტულ შემთხვევაში დაადგინა დარღვევა და რეკომენდაციით მიმართა შინაგან საქმეთა სამინისტროს და სახელმწიფო უსაფრთხოების სამსახურს, მტკიცებულების მოპოვების უზრუნველყოფისთვის ინფორმაცია გამოეცა. 20 დღიანი ვადა ჰქონდათ მათ, რომ ეს რეკომენდაცია შეესრულებინათ, ეს რეკომენდაციები არ შესრულდა, შესაბამისად, დარღვევა დაადგინა სახალხო დამცველმა, რაც პირველი ინდიკატორია, რომ მოცემულ საქმეზე მართლმსაჯულება არ იყო დაინტერესებული ობიექტური გამოძიებით", — თქვა სიჭინავამ.

ბერდია სიჭინავამ ასევე აღნიშნა, რომ პროცესზე წარადგინეს სტატიები თეა წულუკიანის, ანრი ოხანაშვილისა და სხვა თანამდებობის პირების განცხადებებზე, ასევე გამოიკვლიეს ეგორ კოჩიევის პოზიცია.

"ასევე, წარმოვადგინეთ სტატიები, თუ რას საუბრობდნენ თეა წულუკიანი, ანრი ოხანაშვილი და თანამდებობის სხვა პირები ჩორჩანას საქმესთან დაკავშირებით. ასევე, გამოვიკვლიეთ, ეგორ კოჩიევის განცხადება, რომელიც ტაშს უკრავს საქართველოს პროკურატურას გიორგი გახარიას მიმართ დაწყებული სისხლისამართლებრივი დევნისთვის და მოუწოდებს, თუ დაიწყეს დევნა გახარიას მიმართ, ახლა დროა, ჩორჩანას საგუშაგოც აღებული იყოს", — განაცხადა ბერდია სიჭინავამ.

მეტი ე.წ ჩორჩანას საქმეზე: