ხატია დეკანოიძე: საქართველო ხდება ფულის, ურანის და ფსიქოტროპული ნივთიერებების, დაქირავებული მკვლელების გასარეცხი ჰაბი

19 Jul. 2025, 11:39

"თითქმის ყველას გამოგვრჩა ინფორმაცია, რომ აჭარაში დააკავეს ორი ადამიანი, რომლებიც გეგმავდნენ გამდიდრებული ურანის რეალიზაციას.

ეს არის ამბავი, რითაც ჩვენი ქვეყანა მოექცა მსოფლიო პრესის ყურადღების ქვეშ, ევროკავშირთან უვიზო მიმოსვლის შეჩერების მოსალოდნელ კატასტროფასთან ერთად.

ეს დანაშაული იმსახურებს დიდ ყურადღებას. 3 მლნ დოლარის გამდიდრებული ურანი, რომელიც ოფიციალურო წყაროების მიხედვით "არის ბირთვული მასალა, რადიოაქტიური ალფა და გამა გამოსხივების დოზის სიმძლავრისა და წყაროს გათვალისწინებით, როგორც კომპონენტი, გამოსადეგია სხვადასხვა ასაფეთქებელი მოწყობილობის დასამზადებლად, ტერორისტული თავდასხმის განსახორციელებლად ან სხვა მძიმე, მასობრივი და ფატალური შედეგის დადგომისთვის".

ამის შემდეგ, ბათუმში უცხო ქვეყნის მოქალაქის შეკვეთილი მკვლელობა ხდება. დღისით, უამრავი ადამიანის თანდასწრებით.

ეს არ არის პირველი შემთხვევა. კატასტროფა ის არის, რომ ურანი ხვდება საქართველოში ტრანსნაციონალური ორგანიზებული დანაშაულებრივი გზით და შემდეგ ეძებს გასასვლელ არხებს შავ ბაზარზე.

საქართველო ხდება ფულის, ურანის და ფსიქოტროპული ნივთიერებების, დაქირავებული მკვლელების გასარეცხი ჰაბი, რომლის ამოშრობაც თითქმის შეუძლებელია ამ კლეპტოკრატიაში და რუსების აქტიურ შემოდინებაში. აღარ მოქმედებს ჩვენი სტრატეგიული პარტნიორების ტექნიკური და ოპერატიული დახმარება, რომელიც შეჩერდა რეჟიმის პირობებში.

გაცილებით უფრო დიდი კატასტროფა გველოდება იზოლაციის პირობებში.

ევროკავშირთან უვიზო რეჟიმის ერთ-ერთი სტანდარტიც ეს იყო: ორგანიზებულ დანაშაულთან ბრძოლა. ამ დროს, მზია ამაღლობელს ებრძვის მთელი რესურსით რეჟიმი და ამტკიცებს, რომ კაცი კაცია და ბებია ბებიაა.."

ბოლო ამბები: