პრეზიდენტმა გიორგი მარგველაშვილმა უნივერსიტეტში მიმდინარე პროცესებთან დაკავშირებით სტუდენტების კითხვებს უპასუხა. მან რამდენიმეჯერ აღნიშნა, რომ პროცესების შეფასებისგან თავს შეიკავებდა, ვინაიდან ეს პოლიტიკურად გაუმართლებელი იქნებოდა.

“ძალიან ამაღელვებელი იყო ეს პროცესები და ძალიან მინდოდა აქ მოსვლა, მაგრამ პოლიტიკურად მესმოდა, რომ არ უნდა მოვსულიყავი.“

პრეზიდენტმა აღნიშნა, რომ ეს არის წესი, პოლიტიკოსი არ უნდა ჩაერთოს საუნივერსიტეტო პროცესში და საუნივერსიტეტო ამბები სტუდენტებმა ნ უნდა გადაწყვიტონ ადმინისტრაციის და პროფესურის ჩართულობით.

„ეს არის პოლიტიკური აკრძალვა და მე მიმაჩნია, რომ სწორი აკრძალვაა. მიუხედავად იმისა, რომ ვფიქრობ, რომ უნივერსიტეტის საქმე ძალიან კარგად მესმის და ძალიან კარგ სწორ აქცენტებს გავაკეთებდი, არ უნდა გავაკეთო“.

პრეზიდენტმა ისაუბრა არსებული პრობლემების დიალოგის გზით გადაჭრის აუცილებლობაზე.

„ამ პროცესში ინტენსიური დიალოგის საჭიროებაა. ეს ინტენსიური დიალოგი აუცილებლად უნდა შედგეს და ეს უნდა იყოს მართლა კომპრომისული და დიალოგზე დამყარებული ურთიერთობა. დარწმუნებული ვარ, რომ ყველას, როგორც პროფესურას ასევე სტუდენტებს, პრეტენზია აქვთ რომ, აქვთ საკმარისი განათლება და ცოდნა, რომ თავის თავს ინტელექტუალები უწოდონ. აი თუ შესაძლებელი არ არის ინტელექტუალებს შორის დიალოგი და ისინი ურთერთობის რესურსად იყენებენ ისტერიას, დაპირისპირებას, ფიზიკურ დაპირისპირებას ან უხეში ურთიერთობის გარკვევის მექანიზმებს, ამას გავლენა აქვს მთელ საზოგადოებაზე.

თუ თქვენ ვერ შეძელით ერთმანეთში დიალოგის დისკუსიის ფორმატში ურთიერთობის გარკვევა, დანარჩენებს ჩვენ ნუ მოგვთხოვთ ან ნუ გექნებათ პრეტენზია" - დასძინა პრეზიდენტმა.

ამ და სხვა საკითხზე გიორგი მარგველაშვილმა დღეს, თბილისის სახელმწიფო უნივერსიტეტში საჯარო ლექციის შემდეგ ისაუბრა. პრეზიდენტმა ლექცია წაიკითხა აუდიტორიაში, რომელსაც დღეს ზვიად გამსახურდიას სახელი მიენიჭა.