ბოლო დღეებში, ქვეყნის მასშტაბით, მოქალაქეებისთვის, მათ შორის ოპოზიციის წარმომადგენლებისა და აქტივისტებისთვის ნარკოლოგიური შემოწმების ზრდის ფონზე ოცნების ხელისუფლების შინაგან საქმეთა სამინისტრო განცხადებას ავრცელებს, სადაც წერს, რომ შემოწმებული პირებიდან პოლიციელი ვერც გამოარჩევს და ვერც გამორიცხავს ადამიანს პოლიტიკური შეხედულების მიხედვით, რაც, თავის მხრივ, არავისთვის წარმოადგენს ინდულგენციას.

უწყების მიერ გავრცელებულ განცხადებაში ნათქვამია, რომ "ნარკოტიკების წინააღმდეგ ბრძოლის შესახებ გამკაცრებული კანონმდებლობის საფუძველზე, ბოლო ერთი კვირის განმავლობაში, სამინისტროს თანამშრომლების მიერ განხორციელებული ღონისძიებების შედეგად, ქვეყნის მასშტაბით, თბილისსა და რეგიონებში ნარკოლოგიური შემოწმება 314 პირს ჩაუტარდა. აქედან, ნარკოტიკული საშუალების მოხმარების ფაქტი დაუდგინდა 240 პირს, რომელთა საქმეები ქვემდებარეობის მიხედვით გადაგზავნილია სასამართლოში".

მათივე ცნობით, 23-მა პირმა თავი აარიდა ნარკოლოგიურ შემოწმებას, რომლებიც ისევე დაჯარიმდებიან, როგორც ნარკომომხმარებლები, რადგან ეს შესაბამისი საკანონმდებლო ნორმით არის გათვალისწინებული.

ამასთან, როგორც უწყება გავრცელებულ განცხადებაში აღნიშნავს, "ბოლო დღეების განმავლობაში მიმდინარეობს აქტიური ცრუ კამპანია, რომ თითქოს სამართალდამცველები მხოლოდ საპროტესტო აქციის მონაწილეებს, ან რომელიმე კონკრეტული პარტიის წარმომადგენლებს ამოწმებენ, რაც საზოგადოების შეცდომაში შეყვანის მორიგი მცდელობაა"

"მოვუწოდებთ ყველა დაინტერესებულ პირს, თავი შეიკავონ მსგავსი ტიპის დეზინფორმაციის გავრცელებისგან. პოლიციის მიერ გატარებული ყველა ღონისძიება, მათ შორის ნარკოლოგიური შემოწმებაც, მიმართულია ქვეყანაში ნარკოტიკების გავრცელების წინააღმდეგ და ემსახურება ჩვენი საზოგადოების საუკეთესო ინტერესებს.

ასევე მოვუწოდებთ, მედიასაშუალებების წარმომადგენლებს, არათუ ხელი შეგვიშალონ, არამედ გაიზიარონ პასუხისმგებლობა ნარკოტიკების წინააღმდეგ ბრძოლის საქმეში, სადაც ინფორმაციის სწორად მიწოდებას განსაკუთრებული როლი ეკისრება," — აღნიშნულია შსს-ის განცხადებაში

ცნობისთვის, კოალიცია ლელო — ძლიერი საქართველოს სამი წევრი — ოთარ ფარულავა, ლევან ჯორბენაძე და ბექა ბერიძიშვილ პოლიციამ ნარკო-შემოწმებაზე 8 ივლისის ღამეს გადაიყვანა. ამას გარდა, სოციალურ ქსელში გავრცელდა კადრები, რომელშიც ჩანს, რომ პოლიციელებს აქტივისტები ნარკოლოგიურ შემოწმებაზე გადაჰყავთ. მას შემდეგ კიდევ რამდენიმე აქტივისტმა დაწერა, რომ ნარკო-ტესტის ჩაბარება სთხოვეს.

გუშინ, 9 ივლისს სამართალდამცველებმა გირჩი — მეტი თავისუფლების წევრები როკო მწყერაშვილი და თინათინ ბოლოკაძე ნარკო-შემოწმების მიზეზით გააჩერეს. იმის მიუხედავად, რომ მწყერაშვილი ნარკოლოგიურ და ალკოჰოლურ ტესტებზე, რომელთა პასუხებიც 15 წუთში იქნებოდა, ისინი ნარკოლოგიურში მაინც გადაიყვანეს.

.ასევე იხილეთ: