უკრაინის პრეზიდენტი ვოლოდიმირ ზელენსკი პრეზიდენტ ილჰამ ალიევს ტელეფონით ესაუბრა. საუბრის დეტალებზე ის საკუთარ სოციალურ ქსელში წერს.

"მე აზერბაიჯანის პრეზიდენტ ილჰამ ალიევს ვესაუბრე და მადლობა გადავუხადე უკრაინის, ჩვენი ხალხისა და ტერიტორიული მთლიანობის მხარდაჭერისთვის. ასევე გამოვხატე უკრაინის მტკიცე მხარდაჭერა იმ ვითარებაში, როცა რუსეთი სდებს ბრალს აზერბაიჯანის მოქალაქეებს და ემუქრება აზერბაიჯანის რესპუბლიკას.

რუსეთში ძმები საფაროვების მკვლელობის გამო ჩვენი სახელით მივუსამძიმრე აზერბაიჯანის მხარეს. მჯერა, ყველა ფაქტი გამოძიებული იქნება და მართლმსაჯულება აღსრულდება.

პრეზიდენტ ალიევსა და მე საერთო შეხედულება გვაქვს — ყოველი ადამიანის სიცოცხლე და ღირსება უნდა იყოს დაცული.

ასევე განვიხილეთ ორმხრივი ურთიერთობები, მათ შორის ენერგეტიკული და ჰუმანიტარული თანამშრომლობა. შევთანხმდით ეკონომიკური თანამშრომლობის ერთობლივი სახელმწიფოთაშორისო კომისიის ჩატარებაზე. ჩვენს მთავრობებს შორის მუშაობა გაძლიერდება," — დაწერა ვოლოდიმირ ზელენსკიმ.

ცნობისთვის, 2025 წლის 27 ივნისს, აზერბაიჯანელი ძმები ზიადინ და ჰუსეინ საფაროვები რუსეთის პოლიციამ ეკატერინბურგში დააკავა. ისინი იმავე დღეს პოლიციის სამმართველოში გარდაიცვალნენ. აზერბაიჯანში ჩატარებულმა ექსპერტიზამ აჩვენა, რომ ისინი სასტიკად იყვნენ ნაცემი — მათ ჰქონდათ მრავლობითი მოტეხილობები, შინაგანი სისხლდენა და ფილტვის ტრავმა, რაც მკაფიოდ მიუთითებს წამების ფაქტზე. რუსულმა მხარემ თავდაპირველად ერთ-ერთი მათგანის სიკვდილი გულის შეტევით ახსნა, თუმცა აზერბაიჯანმა სისხლის სამართლის საქმე განსაკუთრებული სისასტიკით ჩადენილი განზრახ მკვლელობის მუხლით აღძრა. ეს შემთხვევა სერიოზულ დიპლომატიურ კრიზისად გადაიქცა: აზერბაიჯანმა გააუქმა რუსული კულტურული ღონისძიებები, დაიბარა რუსი დიპლომატები, ასევე დააკავა რუს ჟურნალისტებთან დაკავშირებული პირები, ხოლო რუსეთმა უარყო დანაშაული და აზერბაიჯანის რეაქცია გადაჭარბებულად შეაფასა.