მსოფლიოს უმდიდრესმა ადამიანმა, ილონ მასკმა, აშშ-ის პრეზიდენტ დონალდ ტრამპთან საჯარო დაპირისპირების შემდეგ, ახალი პოლიტიკური პარტიის შექმნის შესახებ განაცხადა. ამის შესახებ BBC წერს.

"2-1 ანგარიშით, თუ გსურთ ახალი პოლიტიკური პარტია, მას აუცილებლად მიიღებთ", — დაწერა ილონ მასკმა X-ზე საჯარო გამოკითხვის შემდეგ.

"როდესაც საქმე ეხება ჩვენი ქვეყნის გაკოტრებას ფლანგვითა და კორუფციით, ჩვენ ერთპარტიულ სისტემაში ვცხოვრობთ და არა დემოკრატიაში.

დღეს ამერიკის პარტია შეიქმნა იმისათვის, რომ დაგიბრუნოთ თქვენი თავისუფლება", — წერს მილიარდერი.

შაბათის მონაცემებით, აშშ-ის ფედერალურ საარჩევნო კომისიას ახალი პარტიის რეგისტრაციის შესახებ რაიმე დოკუმენტი არ გამოუქვეყნებია.

რამდენი საათის წინ, ილონ მასკმა ახალი პარტიის შესახებ დაწერა, რომ ის სახსრების "პასუხისმგებლობიან ხარჯვაზე" იქნება ფოკუსირებული და ვალს შეამცირებს:

" — ვალის შემცირება, მხოლოდ პასუხისმგებლობიანი ხარჯვა,

— სამხედრო ძალების მოდერნიზაცია ხელოვნური ინტელექტით/რობოტიკით,

— პროტექნოლოგიები, დაჩქარება ხელოვნურ ინტელექტში გამარჯვებისთვის,

— რეგულაციების შემცირება ყველა მიმართულებით, განსაკუთრებით ენერგეტიკის სფეროში,

— სიტყვის თავისუფლება,

— პრონატალიზმი,

— ცენტრისტული პოლიტიკა ყველგან", — წერს მასკი.

ამერიკელი მილიარდერი ტრამპს სიტყვიერად და ფინანსურად უჭერდა მხარს საარჩევნო კამპანიის დროს და რესპუბლიკელი კანდიდატის მეორე ვადის დასაწყისში. თუმცა, მოგვიანებით მან დისტანცირება მოახდინა ტრამპის ადმინისტრაციისგან, გადადგა მის მიერ შექმნილი გუნდის, მთავრობის ეფექტურობის დეპარტამენტის ხელმძღვანელის თანამდებობიდან და მოგვიანებით, ახალი ბიუჯეტის და "დილი ლამაზი კანონპროექტის" გამო, სოციალურ მედიაში თავად პრეზიდენტთან მწვავე კამათში ჩაერთო.

დავა ამ კვირაში განახლდა, თუმცა ამას ბიუჯეტის კონგრესში განხილვას ხელი არ შეუშალა, რადგან ტრამპმა მას პარასკევს, დამოუკიდებლობის დღეს მოაწერა ხელი.