ქართველი მუსიკოსის, ლაშა ჩხაპელიას, წარმატებული პროექტი Tamada პრესტიჟული გერმანული პლატფორმის ფოკუსში აღმოჩნდა. პროექტი ColorsxStudios მიზნად ისახავს სხვადასხვა ქვეყნის გამორჩეული მუსიკოსების მსოფლიოსთვის გაცნობას. ამ მიზნით, ის საკუთარ იუთუბ არხზე, რომელსაც 7 მილიონზე მეტი გამომწერი ჰყავს, შემსრულებლების ექსკლუზიურ ცოცხალ ჩანაწერებს ტვირთავს, პარალელურად კი, ვებგვერდისთვის ვრცელ ინტერვიუს წერს მათთან. სხვადასხვა დროს პროექტმა უმასპინძლა ისეთ ცნობილ მუსიკოსებს, როგორებიც არიან ბილი აილიში და Doja Cat. ახლა კი ქართველი Tamada-ის ჯერიც დადგა.

ხალხური მელოდიებისა და ალტერნატიული მუსიკის ნაზავით ცნობილმა Tamada-მ Colors-ისთვის თავისი ახალი ალბომიდან ორი სიმღერა შეასრულა. პირველი ტრეკი, დაო, უკვე აიტვირთა პროექტის იუთუბ არხზე.

"ეს სარკასტული სასიყვარულო სიმღერაა", — აღნიშნავს Tamada Colors-ისთვის მიცემულ ინტერვიუში, — "ისეთ სიყვარულზეა, ვიღაც დედმამიშვილად რომ უფრო გიყურებს, ვიდრე შეყვარებულად. სიმღერის სახელს ორმაგი მნიშვნელობა აქვს: ის, ერთი მხრივ, 'დას' ნიშნავს, მეორე მხრივ კი, ალუზიაა დაოსისტურ ჰარმონიის ფილოსოფიაზე. ეს სიმღერა სიყვარულს იუმორით უფრო უდგება".

ფოტო: Tamada

ამავე ინტერვიუში ქართველმა მუსიკოსმა ისაუბრა, როგორ შეიქმნა პროექტი Tamada. მის ჩამოყალიბებამდე ლაშა ჩხაპელია საკუთარი სახელით ქმნიდა განსხვავებული სტილის მუსიკას, თუმცა, ყველაფერი ერთი შემთხვევის შემდეგ შეიცვალა: როცა შემსრულებელი აივნიდან გადმოვარდა და მძიმედ დაშავდა. ამას მოყოლილ წოლით რეჟიმში გატარებულმა ექვსმა თვემ მუსიკოსს "თვითანალიზისკენ" უბიძგა; ასე გაჩნდა ჩხაპელიას ალტერ-ეგო, ტრადიციების მოყვარული ქართველი კაცი სიმბოლური სახელით — თამადა.

///

მუსიკოსის თქმით, მისი სიმღერები თავისუფლებასა და პატივისცემაზეა. ამ ღირებულებებს ემსახურება Tamada-ის ახალი ალბომიც, რომელსაც მარტის ბოლოსკენ მოვისმენთ.

"ალბომი გაერთიანებისკენ მოგვიწოდებს, დაყოფისა და სიძულვილის დასრულებისკენ", — ამბობს Tamada, — "ის ეხება დაპირისპირებულ პოლიტიკურ სექტორებს საქართველოში. ყველა სიმღერა კონსერვატორებისა და ლიბერალების გაერთიანებას ესწრაფვის: მათთვის იმის ჩვენებას, რომ ჩვენი საზოგადოების ფუნქციონირებისათვის ორივე მხარე მნიშვნელოვანია. ყველამ უნდა იცოდეს, რომ თვითონ მნიშვნელოვანია. რწმენა-შეხედულებების გამო უდიერად მოპყრობას არავინ იმსახურებს".

Tamada დასძენს, რომ "პატივისცემის გარეშე თავისუფლება არც დღეს არსებობს და არც მომავალში იარსებებს".

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...