ოკუპირებულ ტერიტორიაზე, სოფელ ერედვში, შენობა-ნაგებობებს ანგრევენ და ტერიტორიას ნანგრევებისგან წმენდენ. გამოცემა Apsny.ge წერს, რომ დე-ფაქტო სამხრეთ ოსეთის სახელისუფლებო მედიის ცნობით, ე.წ. სამხრეთ ოსეთის სოციალურ-ეკონომიკური საინვესტიციო პროგრამის განვითარების ფარგლებში, 2017 წელს ერედვის ოკუპირებულ ტეროტირიას ნანგრევებისგან გაწმენდენ.

საინვესტიციო პროგრამის განსახორციელებლად რუსეთის მთავრობამ 4,2 მილიარდი რუბლი (70 მილიონი აშშ დოლარი) გამოყო.

პროგრამა ითვალისწინებს 268 სახლის განადგურებას, რომლისგანაც 163 უკვე დაანგრიეს. გამოცემის ცნობით, ნანგრევებისგან გაწმენდის შემდეგ ტერიტორია დე-ფაქტო სოფლის მეურნეობის სამინისტროს გადაეცემა.

შერიგებისა და სამოქალაქო თანასწორობის მინისტრი ქეთი ციხელაშვილი ტელეიმედთან საუბარში ამბობს, რომ აღნიშნული ფაქტი თავისი შინაარსით მიუღებელია:

"ეს არ არის ნანგრევები, სამშენებლო მასალა, ეს არის ცოცხლი კონკრეტული ადამიანების სახლები, რომლებიც დღეს გამოდევნილნი არიან საკუთარი სოფლებიდან. ისინი ვერ ახერხებენ დაბრუნებას, სწორედ იმ განგრძობადი საოკუპაციო პოლიტიკის გამო, რომელსაც რუსეთი ახორციელებს. აქედან გამომდინარე შეფასება არის ძალიან მკვეთრი და ძალიან უარყოფითი".

პარლამენტის თავმჯდომარე ირაკლი კობახიძე მომხდარს აგრესიული პოლიტიკის გაგრძელებად აფასებს:

"ამაზე გაამახვილა ყურადღება პრემიერ-მინისტრმაც გაეროში. ჩვენ მუდმივად ვსაუბრობთ ჩვენს პარტნიორებთან, იმ პოლიტიკასთან დაკავშირებით რომელიც ოკუპირებულ ტერიტორიაზე ხორციელდება".

გორის მუნიციპალიტეტის სოფელი ერედვი ცხინვალიდან 5 კმ-ის მოშორებით მდებარეობს.