პროკურატურამ პოლიციელზე თავდასხმის ფაქტზე პოეტ ზვიად რატიანს ბრალდება წარუდგინა. მათ მიერ გავრცელებულ ინფორმაციაში ვკითხულობთ, რომ შინაგან მიმდინარე წლის 23 ივნისს, საქართველოს პარლამენტის მიმდებარე ტერიტორიაზე ზ. რ. თავს დაესხა და ფიზიკური შეურაცხყოფა მიაყენა საქართველოს შინაგან საქმეთა სამინისტროს საპატრულო პოლიციის თანამშრომელს.

"სამართალდამცველებმა ბრალდებული იმავე დღეს დააკავეს. მას ბრალდება საქართველოს სისხლის სამართლის კოდექსის 353-ე პრიმა მუხლის პირველი ნაწილით (პოლიციელზე თავდასხმა, პოლიციელის სამსახურებრივ საქმიანობასთან დაკავშირებით) წარედგინა, რაც სასჯელის სახედ და ზომად 4-დან 7 წლამდე თავისუფლების აღკვეთას ითვალისწინებს.

პროკურატურამ ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს უკვე მიმართა", — ნათქვამია გავრცელებულ ინფორმაციაში.

ეს პროევროპულ აქციებზე ზვიად რატიანის მეორე დაკავებაა. ის აქციაზე პირველად 2024 წლის 28-29 ნოემბრის ღამეს დააკავეს. მაშინ მას წვრილმან ხულიგნობასა და პოლიციისთვის წინააღმდეგობის გაწევას ედავებოდნენ. 2 დეკემბერს მოსამართლე ზვიად ცეკვავამ ზვიად რატიანს 8-დღიანი პატიმრობა შეუფარდა, რის შემდეგაც, 2024 წლის 9 დეკემბერს მან დროებითი მოთავსების იზოლატორი დატოვა.