გირჩმა სასამართლოს დამცირების, ღირსების შელახვისა და შეურაცხყოფის მიზნით განცხადება გაავრცელა. პარტიაში მიაჩნიათ, რომ სასამართლო ამორალური და უთავმოყვარეოა და მისგან განცხადების გავრცელების შემდეგ ისეთივე რეაგირებას ითხოვენ, როგორიც ფადი ასლის შემთხვევში იყო. ფადი ასლის სასამართლომ მოსამართლის კორუფციაში დადანაშაულების გამო, ზიანის ანაზღაურება დააკისრა.

"მიგვაჩნია, რომ ამ გადაწყვეტილებით სასამართლომ არათუ ღირსება აღიდგინა, არამედ უბიწოების ის უკანასკნელი ნატამალიც დაკარგა, რომელიც სხვადასხვა ხელისუფლებების დროს, არალეგალური სასიყვარულო თამაშებიდან ჰქონდა შემორჩენილი", - ამბობენ გირჩში და დასძენენ, რომ გადაწყვეტილება იმ სასამართლომ მიიღო, რომელსაც არასოდეს ამოუღია ხმა, როცა მოსამართლეებზე ზეწოლა მართლაც ხდებოდა.

პარტიაში აღნიშნავენ, რომ უღირსებო და უთავმოყვარეო სასამართლო აბრუნებს საბჭოთა ნორმას და ადამიანებს სჯის ცილისწამების ბრალდებით და სიამაყით ეძახის ამას ღირსების აღდგენას.

"თავისთავად შემაშფოთებელია ის გარემოებაც, რომ სასამართლოს ოფიციალური ვებგვერდი საქმეს, რომელიც მანვე განიხილა, უწოდებს ღირსების აღდგენას, მაშინ როდესაც სასამართლო უნდა იყოს მიუკერძოებელი და ნეიტრალური არბიტრი იმ საქმეთა მიმართ, რომელსაც ის იხილავს", - ამბობენ გირჩში.