ამერიკის შეერთებული შტატების ელჩი რობინ დანიგანი და უფროსი მრჩეველი უაით ტოლკი ოცნების საგარეო საქმეთა მინისტრ მაკა ბოჭორიშვილს შეხვდნენ. ინფორმაციას აშშ-ის საელჩო ავრცელებს და წერს, რომ "შეერთებული შტატები განაგრძობს საქართველოსადმი თავისი მიდგომის გადახედვას, ამერიკის ინტერესების გასაძლიერებლად".

"დღეს ელჩი დანიგანი და უფროსი მრჩეველი ტოლკი საგარეო საქმეთა მინისტრ ბოჭორიშვილს შეხვდნენ, რათა განეხილათ აშშ-საქართველოს ურთიერთობა.

შეერთებული შტატები განაგრძობს საქართველოსადმი თავისი მიდგომის გადახედვას, ამერიკის ინტერესების გასაძლიერებლად.

შეერთებულმა შტატებმა მკაფიოდ ჩამოაყალიბა ის ნაბიჯები, რომელიც საქართველოს მთავრობას შეუძლია გადადგას იმის საჩვენებლად, რომ სერიოზულად არის განწყობილი აშშ-თან ურთიერთობის გასაუმჯობესებლად," — ნათქვამია საელჩოს მიერ გავრცელებულ განცხადებაში.

მანამდე შეხვედრის შესახებ ოცნების საგარეო სამინისტრომაც გაავრცელა. უწყების ცნობით, ოცნების ხელისუფლების საგარეო საქმეთა მინისტრი, მაკა ბოჭორიშვილი ამერიკის შეერთებული შტატების სახელმწიფო დეპარტამენტის უფროს მრჩეველს უაით ტოლკეს შეხვდა.

მათ ცნობით, შეხვედრაზე საუბარი შეეხო ამერიკის შეერთებული შტატებსა და საქართველოს შორის ურთიერთობებს, თანამშრომლობის პერსპექტივებს და რეგიონში მიმდინარე პროცესებს. ასევე აღინიშნა, რომ საქართველო აშშ-ის მნიშვნელოვანი პარტნიორია. ოცნების ხელისუფლების საგარეო საქმეთა მინისტრმა კიდევ ერთხელ ხაზგასმით აღნიშნა ქართული მხარის მზაობა ამერიკის შეერთებულ შტატებთან სტრატეგიული პარტნიორობის განახლებასთან დაკავშირებით.