საქართველოს კომუნიკაციების ეროვნულ კომისიას მიაჩნია, რომ საზოგადოებრივმა მაუწყებელმა და საზოგადოებრივი მაუწყებლის აჭარის ტელევიზიამ და რადიომ თბილისის მერობის კანდიდატის, კახა კუკავას რეკლამის არ გაშვებით პოლიტიკური რეკლამის განთავსების წესი დაარღვია. ამ მიზეზით, ორივე მაუწყებელს კომისიამ სამართალდარღვევათა ოქმები შეუდგინა.

სარეკლამო რგოლში, რომელიც მაუწყებლებმა არ გაუშვეს ერთ-ერთი ფარმაცევტული პრეპარატია ნახსენები, თბილისის მერობის კანდიდატი კი სააფთიაქო მონოპოლიის დასრულებას ჰპირდება ამომრჩეველს. იმის გამო, რომ რეკლამაში ფარმაცევტული პროდუქტი იყო ნახსენები მაუწყებლებმა მიიჩნიეს, რომ რგოლი კომერციული რეკლამის შინაარსი შეიცავდა და მის განთავსებაზე უარი თქვეს.

"საარჩევნო ბლოკის მიერ წარდგენილი რეკლამის მიზანს არ წარმოადგენს რეკლამაში აღნიშნული კონკრეტული პრეპარატის რეალიზაციის ხელშეწყობა და იგი მიზნად არ ისახავს ფარმაცევტული პროდუქტის გამოყენების პროპაგანდას", - განმარტა კომისიამ და დასძინა, რომ საქართველოს კანონმდებლობით, მაუწყებელი პოლიტიკური და სოციალური რეკლამის შინაარსზე პასუხს არ აგებს.

On.ge გთავაზობთ სარეკლამო რგოლს, რომლის განთავსებაზეც საზოგადოებრივმა მაუწყებელმა და საზოგადოებრივი მაუწყებლის აჭარის ტელევიზიამ და რადიომ უარი თქვეს.