"ეს იყო ივანიშვილის შეთხზული და სუს-ის მიერ შესრულებული სპეცოპერაცია. ბატონი ანრი ოხანაშვილი იმყოფებოდა იმ ბორტზე, რომლითაც მე მომიტაცეს. ამ დანაშაულს იძიებს ანრი ოხანაშვილი, ანუ სუსი იძიებს თავის მიერ ჩადენილ საერთაშორისო დანაშაულს" — ამის შესახებ თბილისის საქალაქო სასამართლოში "თანაინვესტირების ფონდის" ყოფილმა დირექტორმა, გიორგი ბაჩიაშვილმა სასამართლო პროცესზე განაცხადა.

ბაჩიაშვილმა ასევე განაცხადა, რომ ბიძინა ივანიშვილთან მას შემდეგ დაეძაბა ურთიერთობა, რაც მას ანტიდასავლური წერილების გამოქვეყნება მოსთხოვა და ამაზე მან უარი განუცხადა. "თანაინვესტირების ფონდის" ყოფილმა დირექტორმა ასევე დასძინა, რომ დღეს ამ წერილებს ფილოსოფოსი ზაზა შათირიშვილი აქვეყნებს.

"პატივცემულო მოსამართლე, 13 წელი ვმუშაობდი ივანიშვილისთვის სტრუქტურაში, საჯაროდ განვაცხადე, როგორ ხდებოდა სახელმწიფოს მიტაცება... მან პირდაპირ მომთხოვა იმ ანტიდასავლური, ანტიევროპული წერილების გამოქვეყნება, რომელსაც დღემდე ბატონი შათირიშვილი აქვეყნებს. ზუსტად აქ ჩაეყარა საფუძველი იმ დაპირისპირებას, რომელიც ჩვენს შორის მოხდა. ივანიშვილმა მომიწყო სასამართლო პროცესის იმიტაცია, რომელიც 2 წლის განმავლობაში მიმდინარეობდა, ერთადერთი გზა დამიტოვა, ჩემი ბედის ხელში აღება, ამაშია მთელი უბედურება. თუმცა, ესეც არ ეყო და შემდეგ კრიმინალურ მეთოდს — მოტაცებას მიმართა, იმ მეთოდს, რომლითაც 90-იანებში მას ძმა მოსტაცეს, იმ მეთოდს, რომლითაც კალაძეს მოსტაცეს ძმა ზუსტად იგივე მიზნით — ფულის გამოძალვის მიზნით.

ერთადერთი სხვაობა ის იყო, რომ იმ გამომძალველებს და მომტაცებლებს სახელმწიფო მიტაცებული არ ჰქონდათ. ყველა ნორმის დარღვევით, თავზე "მეშოკჩამოფარებული", უკანონოდ, საერთაშორისო კანონის დარღვევით საქართველოში ჩამომიყვანეს. ეს იყო ივანიშვილის შეკვეთით და სუს-ის მიერ შესრულებული სპეცოპერაცია. ბატონი ანრი ოხანაშვილი იმყოფებოდა იმ ბორტზე, რომლითაც მე მომიტაცეს. თქვენთვის ალბათ, გასაკვირი არ არის, მაგრამ ამ დანაშაულს სუსი იძიებს, ანუ სუსი იძიებს თავის მიერ ჩადენილ საერთაშორისო დანაშაულს.

მე როგორ ვიპოვი სამართალი, სად დავიცვა თავი? როგორ ვანდო თავი იმ სასამართლოს, რომელმაც ივანიშვილის ზეპირი ჩვენების საფუძველზე ორი წელი ჯოჯოხეთი მომიწყო მე და ჩემს ოჯახს? როგორ გენდოთ იმ სისტემას, რომელმაც ორად გაყავით საქართველო? ზოგ-ზოგიერთები გამოდიან ტელევიზიით და ამბობენ, რა კარგია, წამება არ არისო, აბა, კითხეთ ჩვენს მშობლებს, თუ არ არის წამება? კითხეთ იმ დაჭერილი ახალგაზრდების, "სინდისის პატიმრების" მშობლებს, მზია ამაღლობელის ოჯახს, თუ არ არის ეს წამება?" — განაცხადა ბაჩიაშვილმა.

შეგახსენებთ, 27 მაისს სახელმწიფო უსაფრთხოების სამსახურმა გაავრცელა ინფორმაცია და ფოტომასალა თანაინვესტირების ფონდის ყოფილი დირექტორის, გიორგი ბაჩიაშვილის დაკავების შესახებ.

მათი ინფორმაციით, "სახელმწიფო უსაფრთხოების სამსახურში 2025 წლის 26 მაისს განხორციელებული ანონიმური შეტყობინებით ცნობილი გახდა, რომ წითელი ხიდისა და სადახლოს შორის არსებული ე.წ. მწვანე საზღვრის მონაკვეთის მიმდებარედ გადაადგილდებოდა წითელი ცირკულარით ძებნილი და მსჯავრდებული საქართველოსა და რუსეთის ფედერაციის ორმაგი მოქალაქე გიორგი ბაჩიაშვილი.

ბაჩიაშვილმა წინა სასამართლო პროცესზე განაცხადა, რომ საქართველოს მისი ექსტრადირებისთვის კანონიერი გზა არ ჰქონდა იმიტომ, რომ ინტერპოლის ძებნა იყო შეჩერებული. "საქართველოს წარმომადგენლებმა ბიძინა ივანიშვილს დავალებით მიმართეს ბანდიტურ გზას და ჩამომიყვანეს საქართველოში", — თქვა ბაჩიაშვილმა.