ჯენის ქომბსმა, შონ "დიდი" ქომბსის დედამ, კვირას დუმილი დაარღვია და განაცხადა, რომ ის "განადგურებული და ღრმად დამწუხრებულია" მისი შვილის წინააღმდეგ წამოყენებული ბრალდებების გამო, ჯენის ქომბსმა ინტერვიუ Fox News Digital-თან ჩაწერა.

როგორც ვიცით, ამერიკელი რეპერი 16 სექტემბერს დააკავეს და ბრალად რეკეტი, თაღლითობა და სექსუალური ტრეფიკინგი ედება. ქომბსს დღემდე არ უღიარებია აღნიშნული ბრალდებები და თავს უდანაშაულოდ მიიჩნევს. ბრალის დამტკიცების შემთხვევაში, მას მინიმუმ 15 წლით თავისუფლების აღკვეთა ან სამუდამო პატიმრობა ემუქრება.

"სულის შემძვრელია ვხედავდე, ჩემს შვილს როგორ სდებენ ბრალს არა სიმართლის საფუძველზე, არამედ იმ ნარატივით, რომელიც სიცრუეზეა აგებული. იყო მოწმე იმისა, რომ შენს შვილს საჯაროდ ადანაშაულებენ მანამ, სანამ საკუთარი უდანაშაულობის დამტკიცების შესაძლებლობა ექნება, ეს არის აუტანელი ტკივილი, რომლის სიტყვებით გამოხატვაც შეუძლებელია. როგორც ნებისმიერი ადამიანი, ჩემი შვილიც იმსახურებს შესაძლებლობას, რომ მოჰყვეს საკუთარ თავზე და თავისი უდანაშაულობა დაამტკიცოს.

ჩემი შვილი არ არის ის ურჩხული, როგორადაც ის წარმოაჩინეს და ის იმსახურებს საკუთარი პოზიციის დაფიქსირების შანსს. მე მხოლოდ ის შემიძლია, რომ ვილოცო, ცოცხალი ვიყო და დავინახო, თუ როგორ დაამტკიცებს ის საკუთარ სიმართლეს. მე აქ არ ვარ იმისთვის, რომ ჩემი შვილი სრულყოფილად წარმოვაჩინო, რადგან არც არის. მან წარსულში უამრავი შეცდომა დაუშვა, ისევე როგორც ჩვენ ყველამ. შეიძლება ის ყველა საკითხთან მიმართებით მართალი არ არის, მაგალითად, მან თავის ყოფილ შეყვარებულზე ძალადობის ფაქტი უარყო მაშინ, როდესაც ვიდეო ჩანაწერები სხვა რამეს აჩვენებს.

ზოგჯერ სიმართლე და ტყუილი ისე ირევა ერთმანეთში, რომ შემზარავი ხდება ამ ამბის აღიარება, განსაკუთრებით მაშინ, როდესაც ეს სიმართლე ნორმის მიღმაა და ზედმეტად რთული დასაჯერებელია. ამ განსაცდელში ყველაზე რთული იმის ყურებაა, თუ როგორ ართმევენ ჩემს საყვარელ შვილს ღირსებას და ეს ხდება არა იმის გამო, რაც მან გააკეთა, არამედ მხოლოდ იმიტომ, რომ ამ ყველაფრის ხალხს სჯერა. გთხოვთ, იფიქროთ მათზე, ვინც უსამართლოდ იდევნებოდა, გახსოვდეთ, რომ ყველა, ვინც ცხოვრებაში შეცდომა დაუშვა, არ იმსახურებს მთელი მისი განვლილი ცხოვრება და პიროვნება მხოლოდ ერთი ქმედებითა და რამდენიმე შეცდომით შეფასდეს", — განაცხადა ჯენის ქომბსმა.