მექსიკის ცენტრალურ ნაწილში მომხდარი მიწისძვრის შედეგად, სულ მცირე, 226 ადამიანი დაიღუპა და ათეულობით შენობა ჩამოინგრა. აქედან 117 დედაქალაქ მეხიკოში, 39 კი - პუებლაში დაიღუპა, იქ სადაც ბიძგების ეპიცენტრი იყო.

გარდაცვლილთა რაოდენობის შესახებ ინფორმაცია სამოქალაქო დაცვის ეროვნულმა კოორდინატორმა ტვიტერის საკუთარ გვერდზე დაადასტურა:

პრეზიდენტ ენრიკე პენა ნიეტოს თქმით, მეხიკოში დაღუპულთა შორის 20 ბავშვია და 30-ს ჯერ კიდევ ეძებენ სკოლის შენობის ნანგრევებში.

აშშ-ის გეოლოგიური კვლევითი ცენტრის ინფორმაციით, მიწისძვრის ეპიცენტრი მეხიკოდან 120 კმ-ის მოშორებით, პუებლაში იყო.

მექსიკაში 7,1 მაგნიტუდის მიწისძვრა გუშინ, 19 სექტემბერს მოხდა. ახალი ამბების გამოშვების წამყვანი ენრიკე ეჩევედო ტვიტერის საკუთარ გვერდზე შენობების ნგრევის ამსახველ ვიდეოს ავრცელებს:

როგორც BBC წერს, ზუსტად 32 წლის წინ, მეხიკოში მომხდარმა მიწისძვრამ 10 ათასამდე ადამიანი იმსხვერპლა. მექსიკა მსოფლიოში ერთ-ერთი მჭიდროს დასახლებული ქალაქია, სადაც მოსახლეობის რაოდენობა 20 მილიონს აღემატება.

გუშინ მომხდარი მიწისძვრის შემდეგ, მეხიკოში მცხოვრებ დაახლოებით ორ მილიონ მომხმარებელს შეუწყდა ელექტროენერგიის მიწოდება და დაიკარგა სატელეფონო კავშირი. ჩამოინგრა 6-სართულიანი საცხოვრებელი კორპუსები, სუპერმარკეტებისა და ქარხნის შენობები.