დღეს, 19 სექტემბერს, ქვემო ფონიჭალაში, კიდევ ერთი სპეცოპერაცია ჩატარდა, რომლის შედეგად ნარკორეალიზაციის ბრალდებით ერთი პირი დააკავეს. შსს-ს ცნობით, გამოძიება 260-ე მუხლის მეოთხე ნაწილით მიმდინარეობს, რაც ბრალის დამტკიცების შემთხვევაში ექვსიდან თერთმეტ წლამდე პატიმრობას ითვალისწინებს.

მხოლოდ აგვისტოში, ფონიჭალაში, ჯამში 5 პირი დააკავეს ამავე ბრალდებით.

12 აგვისტოს, 33 შეკვრა ჰეროინის შეძენა-შენახვის ბრალდებით ფონიჭალაში ძმები ჯაფაროვები დააკავეს. 14-ში, ასევე ფონიჭალაში, სპეცოპერაციის შედეგად, ნარკოტიკების უკანონო შეძენა-შენახვისთვის ერთი პირი დააპატიმრეს. ოთხი შეკვრა ჰეროინის გასაღების ბრალდებით დააკავეს ერთი ადამიანი 15 აგვისტოს, ხოლო 16-ში, კიდევ ერთი პირი - ნარკორეალიზაციის ბრალდებით.

შინაგან საქმეთა სამინისტროში On.ge-ს უთხრეს, რომ საქმეები ერთმანეთთან კავშირში არ არის.