ოცნების პარლამენტის დროებითი საგამოძიებო კომისიის თავმჯდომარე, თეა წულუკიანი საგამოძიებო კომისიის სხდომაზე ვახტანგ გომელაურის გადადგომას გამოეხმაურა. მისი თქმით, "90-იანი წლებიდან დღემდე ის [გომელაური]საქართველოს საუკეთესო შინაგან საქმეთა მინისტრი იყო".

"მინდა, ბატონ ვახტანგ გომელაურს მადლობა გადავუხადო გაწეული საქმიანობისთვის. ზუსტად ამ წუთებში ჩვენ შევიტყვეთ მისი ნება-სურვილისა და გადადგომის შესახებ. მიმუშავია რა მასთან და მიმუშავია არა ერთი წელი ვთვლი, რომ 90-იანი წლებიდან დღემდე ის იყო საქართველოს საუკეთესო შინაგან საქმეთა მინისტრი და ის, ვინც თავისი საქმით, თავისი პროფესიონალიზმით და ღირსებით ქმნიდა ისეთ პირობებს, რომ როგორც ქვეყანა და სახელმწიფო ინსტიტუტები, ასევე პოლიტიკური ხელისუფლება და მისი ყველა შტო იყო მშვიდად", — თეა წულუკიანი ოცნების პარლამენტის დროებითი საგამოძიებო კომისიის სხდომაზე ვახტანგ გომელაურის გადადგომას გამოეხმაურა.

ცნობისათვის, შს მინისტრის თანამდებობის დატოვების შესახებ განცხადება სანქცირებულმა ვახტანგ გომელაურმა დღეს გაავრცელა. მისი თქმით, "დღეს, როდესაც ქვეყანაში მშვიდი ვითარებაა, თავს უფლება მისცა და გუნდს სთხოვა თანამდებობის დატოვება, რაც მისცემს საშუალებას, რომ ოჯახს — მეუღლეს, შვილებს და ახლად შეძენილ შვილიშვილს მეტი დრო დაუთმოს".