ოცნების პრემიერმა, ირაკლი კობახიძემ მადლობას გადაუხადა სახელმწიფო უსაფრთხოების სამსახურს გიორგი ბაჩიაშვილის დაკავების ოპერაციის წარმატებით ჩატარებისთვის. მისი თქმით, "ძალიან მნიშვნელოვანია ყველა მიმართულებით სამართლის უზენაესობის უზრუნველყოფა".

"ბაჩიაშვილის შემთხვევაზე დეტალებთან დაკავშირებით სუს-ი თავად გაავრცელებს ინფორმაციას, ეს არის მათი ფუნქცია, მათი პასუხისმგებლობა. მე ზოგადად, შემიძლია, მადლობა გადავუხადო სახელმწიფო უსაფრთხოების სამსახურს, რომ ეს ოპერაცია წარმატებით ჩატარდა, სათანადოდ ჩატარდა. რა თქმა უნდა, ძალიან მნიშვნელოვანია ყველა მიმართულებით სამართლის უზენაესობის უზრუნველყოფა, სამართლის და კანონის აღსრულება და კიდევ ერთხელ, დიდი მადლობა სახელმწიფო უსაფრთხოების სამსახურს," — განაცხადა ირაკლი კობახიძემ.

რაც შეეხება გავრცელებულ ხმებს იმის შესახებ, რომ ბაჩიაშვილის დაკავება ზურაბ პოლოლიკაშვილის მიერ გაეროს მსოფლიო ტურიზმის ორგანიზაციის გენერალური მდივნის თანამდებობაზე კანდიდატურის მოხსნას უკავშირდება, კობახიძე ამბობს, რომ "შეურაცხმყოფელია".

"ეს არის მრავალმხრივ შეურაცხმყოფელი ვერსია და არასწორია ასეთი ვერსიების გავრცელება. ვიცით ასეთ ვერსიებს ვინ ავრცელებს და არანაირი ზღვარი არ აქვთ, როცა საქმე ეხება სახელმწიფოს ინტერესებს. რაც შეეხება ზურაბ პოლოლიკაშვილს, მე განვმარტე, რა იყო მისი კანდიდატურის მოხსნის მიზეზი და ამას არაფერ სხვასთან არ ჰქონია შემხებლობა. მიზეზი იყო ის, რომ მან შეურაცხყოფა მიაყენა სახელმწიფოს", — განაცხადა კობახიძემ.

შეგახსენებთ, რომ დღეს, 27 მაისს სახელმწიფო უსაფრთხოების სამსახურმა გაავრცელა ინფორმაცია და ფოტომასალა თანაინვესტირების ფონდის ყოფილი დირექტორის, გიორგი ბაჩიაშვილის დაკავების შესახებ.

• გიორგი ბაჩიაშვილი დააკავეს

მათი ინფორმაციით, "სახელმწიფო უსაფრთხოების სამსახურში 2025 წლის 26 მაისს განხორციელებული ანონიმური შეტყობინებით ცნობილი გახდა, რომ წითელი ხიდისა და სადახლოს შორის არსებული ე.წ. მწვანე საზღვრის მონაკვეთის მიმდებარედ გადაადგილდებოდა წითელი ცირკულარით ძებნილი და მსჯავრდებული საქართველოსა და რუსეთის ფედერაციის ორმაგი მოქალაქე გიორგი ბაჩიაშვილი.