ზრდასრულობა ასეთი რთული თუ იქნებოდა, არავის გავუფრთხილებივართ — სამსახური, სახლის საქმეები, აქციები, ოჯახის წევრებზე ზრუნვა, მეგობრების სანახავად დროის გამონახვა... ამდენი საქმისა და პასუხისმგებლობის გადამკიდეს, განსატვირთად და ჩვენს თავებთან დასარჩენად ცოტა დრო გვრჩება ხოლმე, შესაბამისად, ეს შეზღუდული ფუფუნება მაქსიმალურად უნდა გამოვიყენოთ.

გადაღლილებს ოსკარის რომელიმე ნომინაციაში წარდგენილი ფილმის ან დაძაბული დოკუმენტური ნამუშევრის ყურების თავი თუ არ გაქვთ, გთავაზობთ ყველასთვის საყვარელ და კარგად ნაცნობი ფილმების სიას, რომლებიც აუცილებლად კარგ ხასიათზე დაგაყენებენ და გულს გაგითბობენ:

1. ზაზუნას დღე — Groundhog Day

ზაზუნას დღე კლასიკად ქცეული ფილმია, რომელმაც ყველას შეგვაყვარა ბილ მიურეი. ყველაზე მოწყენილ დღეებშიც კი, სიუჟეტი, რომელიც ერთი და იგივე დღის გამეორებასა და ცინიკოსი ტელეწამყვანის სულიერ ზრდაზე მოგვითხრობს, აუცილებლად გაგითბობთ გულს.

2. რატატუი — Ratatouille

რატატუი მაყურებლის გულს ყველაზე სწორ ადგილებში ხვდება — შეუძლებელია, ამ ანიმაციურმა ფილმმა შეფ-მზარეული თაგვის, რემის მიმართ მაშინვე სიყვარულით არ აგავსოს და ბავშვობის ნოსტალგია არ გაგიღვიძოს.

3. ამელი — Amélie

ამელის, უცნაურად საინტერესო ფრანგი გოგოს ესთეტიკური თავგადასავალი ყველაზე ცუდ დღესაც გაგილამაზებთ და დაგარწმუნებთ, რომ მაგია რეალურია.

4. პრინცესას დღიურები — The Princess Diaries

ამერიკელი თინეიჯერის ჯენოვიას პრინცესად ქცევის ისტორია მაშინვე თინეიჯერობის დღეებში დაგაბრუნებთ.

5. მიაღწიე წარმატებას — Bring It On

გოგოების დრამა, პირველი სიყვარული და ბრძოლა გამარჯვებისთვის — ეს 2000-იანების კომედია აუცილებლად გაგახალისებთ.

6. როცა ჰარიმ გაიცნო სალი — When Harry Met Sally

თუ რომანტიკული კომედიების მოყვარული ხართ, ეს ფილმი აუცილებლად გექნებათ ნანახი. სალის და ჰარის სიყვარულის ისტორია, მახვილგონივრული დიალოგები და ნიუ-იორკის ულამაზესი პეიზაჟები იდეალური სიუჟეტია ხელახლა საყურებლად.

7. მამა მია! — Mamma Mia!

საბერძნეთის კუნძულზე დატრიალებული ამ მუსიკალური ქარიშხლის ყურებისა და განცდის შემდეგ ყველანაირი დაღლილობა გაგიქრებათ.

8. პატარძლის მამა — Father of the Bride

შვილები თითქოს ერთი თვალის დახამხამებაში იზრდებიან — სტივ მარტინი ამას თავისი კომიკურობითა და გულწრფელობით გვახსენებს. გაიხსენეთ ეს ცნობილი საოჯახო ფილმი და მოემზადეთ იმისთვის, რომ იტიროთ, იცინოთ და ბოლოს მამათქვენთან დარეკოთ.

9. ეშმაკს აცვია პრადა — The Devil Wears Prada

ეს ფილმი არაა მხოლოდ მოდაზე — ეს არის ამბავი ძალაუფლებაზე, საკუთარ თავზე და… მირანდა პრისტლიზე. ხელახლა ჩართეთ და გაიხსენეთ, როგორი შთამაგონებელია მაღალ ქუსლებზე შემომდგარი ძლიერი ქალების ბრწყინვალება.

10. თქვენთვის წერილია – You've Got Mail

გადახედეთ ტომ ჰენქსისა და მეგ რაიანის საკულტო რომანტიკულ დრამას და გაიხსენეთ დრო სმარტფონების არსებობამდე.

11. ჩემი მეზობელი ტოტორო – My Neighbor Totoro

თუ ბავშვობის ჯადოსნურობა და მელანქოლია ერთად გენატრებათ, ტოტორო არის ის ანიმაცია, რომელიც გულს გაგითბობთ. უყურეთ ამ საოცარ ანიმაციას ხელახლა და გაიხსენეთ, როგორია, როცა საოცრებების გწამს.

12. სიამაყე და ცრურწმენა – Pride and Prejudice

ელიზაბეტ ბენეტისა და მისტერ დარსის სასიყვარულო ისტორია, წვიმიანი ბრიტანეთი და უთქმელი სიტყვები ლიტერატურის ერთ-ერთი ყველაზე ცნობილი ნარატივია, რომლის ხელახლა ყურებაც არასდროს მოგბეზრდებათ.

13. სიყვარულით, როუზი – Love, Rosie

თუ ფიქრობთ, რომ სწორი მომენტის შერჩევა სიყვარულის მთავარი გამოწვევაა, ეს ფილმი საოცარ ისტორიაში გამოგზაურებთ. ჩაიცვით პიჟამო, მოიმზადეთ ჩაი და განიცადეთ მთავარი პერსონაჟების ყველა თავბრუდამხვევი ემოცია.

14. ჩემი დიდი ბერძნული ქორწილი — My Big Fat Greek Wedding

თუ ოდესმე გიფიქრიათ, რომ თქვენი ოჯახი ზედმეტად ქაოტურია, ამ ფილმის ყურებისას შვებით ამოისუნთქებთ და ბევრსაც იცინებთ.

15. ჭამე, ილოცე, შეიყვარე — Eat, Pray, Love

ზოგჯერ უბრალოდ საჭიროა პასტა, მედიტაცია და ახალი დასაწყისი. ხელახლა უყურეთ ამ ფილმს და გაიხსენეთ, რომ ცხოვრების სიყვარული საკუთარი თავის შეყვარებით იწყება.