კლინიკა "ვივამედში" წუხელ გარდაცვლილი პატიმრის, იოსებ გორგაძის ადვოკატი მუხრან ღურწკაია ტელეკომპანია "პირველის" ჟურნალისტთან საუბრისას აცხადებს, რომ იოსებ გორგაძეს თავის და სახის მიდამოებში დაახლოებით 30-ზე მეტი დაზიანება ჰქონდა და შეუძლებელია, რომ ეს დაზიანებები ერთი წაქცევით მიეღო. მისივე თქმით, გამოძიება მიმდინარეობდა დაახლოებით 4 თვეა, მაგრამ არანაირი შედეგი არ ჰქონია.

"გამოძიება მიმდინარეობდა დაახლოებით 4 თვეა, მაგრამ არანაირი შედეგი - არავისთვის არც ბრალი წაუყენებიათ, არც დაუკავებიათ, სისხლის სამართლებრივი დევნა დაუწყიათ. პირიქით, გამოძიებას აქვს ის ვერსია, რომ სავარაუდოდ, იოსებ გორგოძე წაიქცა და ისე მიიღო ეს დაზიანებები. თქვენ იცით, რომ იოსებ გორგოძეს აქვს თავის და სახის მიდამოებში დაახლოებით 30-ზე მეტი დაზიანება. წარმოუდგენელია, ასეც რომ იყოს, ერთი წაქცევით ეს დაზიანებები მიეღო, წარმოუდგენელია, რომ მარტო პატიმრებს გაეკეთებინათ ეს. სავარაუდოდ, არის გარეული დაწესებულების თანამშრომლების ხელი. ინსულტის დიაგნოზით შეიყვანეს "ვივამედის" კლინიკაში. შემდეგ "ვივამედმა" გასცა ოფიციალური დოკუმენტაცია. მათ შორის სამედიცინო ისტორია და "ფორმა 100", სადაც პირდაპირ არის მითითებული, რომ არანაირი ინსულტი ამ ადამიანს არ ჰქონდა. ინსულტის ნიშნებიც კი არ ჰქონდა", — ამბობს ადვოკატი ტელეკომპანია "პირველის" ჟურნალისტთან.

მიმდინარე წლის იანვარში, გლდანის მე-8 დაწესებულებიდან კლინიკა "ვივამედში" დაზიანებებით გადაყვანილი 46 წლის პატიმარი, იოსებ გორგაძე გარდაიცვალა.

შეგახსენებთ, რომ 29 იანვარს, ტელეკომპანია "პირველმა" გაავრცელა ინფორმაცია, რომ გლდანის ციხიდან ნაცემი პატიმარი კლინიკა "ვივამედში" გადაიყვანეს.

"მთავარის" ინფორმაციით, ცნობილია, რომ წინასწარ პატიმრობაში მყოფი პირი ავარიის შემდეგ დააკავეს, როდესაც თბილისიდან წალკაში, ქართული ოცნების აქციიდან მიმავალ აქტივისტებს შეეჯახა. ავარიას მსხვერპლი არ მოჰყოლია.

სახალხო დამცველის აპარატის ცნობით, კლინიკაში ომბუდსმენის რწმუნებული იყო მისული, მაგრამ პაციენტის ჯანმრთელობის მდგომარეობის გამო მისი ნახვა ვერ შეძლო. სახალხო დამცველმა გამოძიებას მოუწოდა, შემჭიდროებულ ვადებში მოხდეს ფაქტის გამოძიება და პატიმრის დაზიანებების წარმოშობისა და ჯანმრთელობის მდგომარეობის დამძიმების მიზეზების დადგენა.

IPN-ის ცნობით, სპეციალური საგამოძიებო სამსახურში აცხადებენ, რომ მათ კლინიკა "ვივამედში" 46 წლის იოსებ გორგაძის გარდაცვალებასთან დაკავშირებით გამოძიება დაიწყეს.