"არაერთხელ ვნახეთ, რომ გერმანიის ელჩი პირდაპირ ჩაეწერა „ნაცმოძრაობის“ აქტივისტებში, ეს სამწუხარო მოცემულობაა, მაგრამ ფაქტია", – პარლამენტის დროებითი საგამოძიებო კომისიის წევრი, გურამ მაჭარაშვილი საქართველოში გერმანიის ელჩის, პეტერ ფიშერის განცხადებას გამოეხმაურა. ფიშერმა გერმანიის მიერ დაწესებულ სანქციებზე თქვა, რომ არ სურთ, ადამიანის უფლებების დამრღვევები მათ ქვეყანაში შევიდნენ.

"ელჩი კი არა, რა თანამდებობაზეც არ უნდა იყო, ელემენტარულად ჯერ ადამიანი უნდა იყო და შემდეგ უნდა იყო ან გერმანელი, ან ნებისმიერი ეთნოსის წარმომადგენელი. როცა უყურებ, ორ თვეზე მეტია ჩვენთან კომისიაში ის ადამიანები მოდიან, ვინც გადაურჩა სიკვდილს, მათ შორის ადეიშვილის მიერ შექმნილი რეჟიმის სიკვდილს და ზოგი ან ფიზიკურად არის დაზიანებული, ან ქონება წართმეული და ასევე დაზიანებული, ან საპატიმროებში და საწამებლებში გამოვლილი და ა.შ. ეს არის მოცემულობა იმ გერმანიის ელჩის განცხადებაზე, რომელიც, სამწუხაროდ, კიდევ ერთხელ ვიმეორებ, ძალიან კარგად ჩაეწერა "კოლექტიური ნაცმოძრაობის“ აქტივისტებში", – აღნიშნა მაჭარაშვილმა.

საქართველოში გერმანიის ელჩის ინფორმაციით, გერმანიას ჯამში 13 პირი ჰყავს სანქცირებული, თუმცა მათი ვინაობა უცნობია. პეტერ ფიშერის განმარტებით, გერმანულ მხარეს არ სურს ადამიანის უფლებათა დამრღვევები მათ ქვეყანაში ჩავიდნენ. ამის შესახებ დიპლომატმა BMG-ს ეთერში საუბრისას განაცხადა.

"როცა ჩამოვედი საქართველოში პრემიერმა მითხრა, რომ თქვენ ჩვენი საუკეთესო მეგობრები ხართ, ბევრმა იგივე მითხრა, თუმცა 2024 წლიდან ყველაფერი შეიცვალა. დეტალებში ვერ შევალ, მაგრამ ჩვენი ურთიერთობა კრიზისშია. ჩვენი შეფასებით, დემონსტრანტების მიმართ ადამიანის უფლებები დაირღვა, ასევე დაირღვა შეკრებისა და გამოხატვის თავისუფლება. ევროკავშირში შესასვლელად ადამიანის უფლებების პატივისცემა ფუნდამენტურია, თუმცა ის დაირღვა და თანაც ძალიან მნიშვნელოვნად. ჩვენი პოლიტიკა და ზოგადად აღქმა ისეთია, რომ ადამიანის უფლებები საშინაო პოლიტიკის ნაწილად არ მიგვაჩნია, რადგან არსებობს ადამიანის უფლებების საერთაშორისო სტანდარტი. ჩვენი მოვალეობა მათი დაცვაა. სწორედ ამიტომ დავაწესეთ სანქციები 13 პირის მიმართ, რაც იყო ქვეყანაში შესვლის აკრძალვა. დავუწესეთ სანქციები 13 პირს, რომლებიც ჩვენი შეფასებით პასუხისმგებლები იყვნენ ადამიანის უფლებების დარღვევაზე. არ გვსურს ადამიანის უფლებების დამრღვევები ჩავიდნენ ჩვენს ქვეყანაში", — თქვა ელჩმა.