სოციალური სამართლიანობის ცენტრი (SJC) ოცნების ხელისუფლების მიერ დაანონსებული პარტიების აკრძალვის ინიციატივას ეხამურება და განცხადებას ავრცელებს.

"2025 წლის 27 მარტს, ქართულმა ოცნებამ დააინიცირა კანონპროექტი, რომელიც, მათივე თქმით, უზრუნველყოფს "კოლექტიური ნაცმოძრაობის" არჩევნებში მონაწილეობის აკრძალვას. რთული სათქმელია, ზუსტად რომელი ოპოზიციური პარტიები არის ამ კანონპროექტის სამიზნე, თუმცა მამუკა მდინარაძის განმარტებით, რეჟიმთან დაპირისპირებული ძალები "როგორც ანტიქართული, ანტიკონსტიტუციური, ანტიეროვნული და დანაშაულებრივი პარტიები, არაკონსტიტუციურ პარტიებად გამოცხადდებიან და აეკრძალებათ საქმიანობა!"

31 მარტს, პარლამენტის ბიურომ მიიღო შესაბამისი გადაწყვეტილება და დაავალა წამყვან (იურიდიულ) კომიტეტს, რომ დაიწყოს კანონპროექტის განხილვის პროცედურები. 14 აპრილს, იურიდიულმა კომიტეტმა, პირველი მოსმენით მხარი დაუჭირა წარმოდგენილ კანონპროექტს.

დაანონსებული საკანონმდებლო პაკეტი რეალურად ორ ცვლილებას ითვალისწინებს.

პოლიტიკური პარტიების აკრძალვის საფუძვლების გაფართოება, რაც ეწინააღმდეგება კონსტიტუციას — ცვლილება "მოქალაქეთა პოლიტიკური გაერთიანებების შესახებ" ორგანული კანონის 36-ე მუხლს ეხება, სადაც დამატებით განისაზღვრება, რომ საკონსტიტუციო სასამართლოს შეუძლია აკრძალოს პარტია, თუ მისი მიზანი, საქმიანობის არსი ან პარტიული სიის შემადგენლობა არსებითად იმეორებს უკვე აკრძალული პარტიის მიზანსა და საქმიანობას. განმარტებით ბარათში აღნიშნულია, რომ ეს პოლიტიკურ პარტიებზე "ეფექტიანი საკონსტიტუციო კონტროლის" განხორციელებას ემსახურება.

თუმცა, ეს ნორმა ახალ აკრძალვის საფუძველს აწესებს, რომელიც კონსტიტუციით განსაზღვრულ ჩამონათვალს სცდება და პარტიის აკრძალვის კრიტერიუმად მისი "მსგავსებას" სხვა პარტიასთან აცხადებს. ტერმინები ბუნდოვანია და საკონსტიტუციო სასამართლოს გადაწყვეტილების თვითნებურობის საფრთხეს ქმნის, რაც კონსტიტუციით აკრძალულია.

პოლიტიკური პარტიების აკრძალვის საკითხის შემჭიდროებულ ვადებში განხილვა და სტანდარტის რადიკალური გაუარესება — რაც გულისხმობს პარტიის აკრძალვის საქმის განხილვის ვადების მკვეთრად შემჭიდროებას — ზოგ შემთხვევაში მაქსიმუმ 9 თვემდე, ხოლო საარჩევნო პერიოდში ე.წ. მსგავსი პარტიის შემთხვევაში - 14 დღემდე. მაშინ, როცა კონსტიტუცია პარტიის აკრძალვას მკაცრ პროცედურულ და შინაარსობრივ სტანდარტებს უკავშირებს, კანონპროექტი პარტიის გაუქმებას ორკვირიან ვადაში შესაძლებელს ხდის.

საერთოდ, კონსტიტუცია პოლიტიკური პლურალიზმის და დემოკრატიის დაცვის გარანტიას წარმოადგენს. პარტიების როლი და მათი აკრძალვის საფუძვლები მკაცრად და ამომწურავადაა განსაზღვრული. წარმოდგენილი კანონპროექტი კი, არც ერთ ამ კრიტერიუმს არ აკმაყოფილებს, კონსტიტუციურ გარანტიებს არღვევს და პარტიებისთვის სამართლებრივ რეჟიმს საგრძნობლად ამკაცრებს.

დოკუმენტში ასევე განხილულია:

ინიცირებული კანონპროექტის მიმოხილვა და მისი შეუსაბამობა კონსტიტუციასთან;

პარტიების აკრძალვა ­­— როგორც დემოკრატიისა და უსაფრთხოების დაცვის უკიდურესი ზომა;

"ძველი" და "ახალი" პარტიების ურთიერთკავშირი, ინდივიდუალური და ორგანიზაციული პასუხისმგებლობის საკითხები;

საკონსტიტუციო სასამართლოს პოლიტიკური მიტაცება და დემოკრატიული სივრცის შეზღუდვა, — ნათქვამია SJC-ს მიერ გავრცელებულ ინფორმაციაში.