დიდმა ბრიტანეთმა ქართული ოცნების ხელისუფლების ოთხი მაღალჩინოსანი დაასანქცირა.

დიდი ბრიტანეთის ფინანსური სანქციების განხორციელების სამსახურის (Office of Financial Sanctions Implementation) ვებგვერდის მიხედვით დასანქცირდნენ:

შალვა ბედოიძე — საქართველოს შინაგან საქმეთა მინისტრის მოადგილე;

მირზა კეზევაძე — შსს-ის განსაკუთრებულ დავალებათა დეპარტამენტის უფროსის მოადგილე;

კარლო კაციტაძე — სპეციალური საგამოძიებო სამსახურის უფროსი,

გიორგი გაბიტაშვილი — გენერალური პროკურორი.

დიდი ბრიტანეთის ფინანსური სანქციების განხორციელების სამსახურის მიერ გავრცელებულ ინფორმაციაში ნათქვამია, რომ აღნიშნული სანქცია 19 მარტს ამოქმედდა და მისი განხორციელება მოხდა დიდი ბრიტანეთის საგარეო საქმეთა, თანამეგობრობისა და განვითარების ოფისის (FCDO), სავაჭრო სანქციების განხორციელების ოფისის (OTSI) და ფინანსური სანქციების განხორციელების ოფისის (OFSI) ელექტრონული ფოსტის შეტყობინებების სერვისის ფარგლებში.

მათი განმარტებით, სანქციების ეს პაკეტი მიმართულია საქართველოს ოფიციალური პირების მიმართ, რომლებიც პასუხისმგებელნი არიან ადამიანის უფლებების სერიოზულ დარღვევებზე, 2020 წლის ადამიანის უფლებების გლობალური სანქციების რეგულაციის თანახმად.

სანქციები ითვალისწინებს აქტივების გაყინვას და სამოგზაურო აკრძალვას.

შეგახსენებთ, რომ მიმდინარე წლის 2 აპრილს დიდმა ბრიტანეთმა "სერიოზულ კორუფციულ საქმიანობაში ჩართვის გამო" თბილისის სააპელაციო სასამართლოს თავმჯდომარეს, მიხეილ ჩინჩალაძეს და იუსტიციის უმაღლესი საბჭოს წევრს, ლევან მურუსიძეს ფინანსური სანქციები დაუწესა. აღნიშნული სანქციები ითვალისწინებს ფინანსური სახსრების გაყინვას იმ პირებისთვის, რომლებიც არიან ან იყვნენ ჩართულნი სერიოზულ კორუფციაში.