ჟურნალისტის კითხვაზე — "უცხო ძალა" რა ტერმინია, ვის გულისხმობთ და თქვენ არ იცით, რომ საბჭოთა არმიამ განახორციელა ეს დარბევა?", ოცნების პარლამენტის თავმჯდომარემ, შალვა პაპუაშვილმა უპასუხა, რომ იდეოლოგიის ნაწილია ის, რომ ადამიანებს მხოლოდ ორი სიტყვის გაგონება სურთ: რუსეთის და ევროპის.

"ეს უნდა გესწავლათ სკოლაში და ამაზე თუ ვინ კითხვებს სვამს, რა მოხდა და როგორ მოხდა, ესაა პრობლემა", — განაცხადა პაპუაშვილმა.

"ესეცაა ერთ-ერთი მთავარი იდეოლოგია, რასაც ცდილობენ, ამ სამშობლოდაკარგული ადამიანების ხელით აკეთონ – ბინარული აზროვნება, როდესაც ადამიანებს უნდათ მხოლოდ ორი სიტყვის გაგონება: რუსეთის და ევროპის. სხვა შინაარსში ხომ არ ერკვევიან საერთოდ არაფრის. არ არსებობს არაფერი, არსებობს თეთრი-შავი, რუსეთი-ევროპა. სხვა ნაბიჯის გადადგმის და აზროვნების შესაძლებლობა მათ არ აქვთ. ეს ისტერიაც ამის მაჩვენებელი და მკვებავია, ადამიანები აზროვნებენ ბინარულად, უფრო სწორად, რეაგირებენ თრიგერებზე, გამაღიზიანებლებზე, სიტყვებზე, რომლებიც მათ უნდათ, მოისმინონ. 1989 წელს იმ მოქალაქეებმა, რომლებმაც ეს ჩვენი თვალით ვნახეთ, ძალიან კარგად ვიცით, ვინ მოდიოდა იქ ნიჩბებით, ვინ აგვიჩეხა ჩვენ ახალგაზრდები და ასაკოვნები და კარგად ვიცით, ვინ იდგა იქ — საბჭოთა არმია, რომელიც რუსული იმპერიის გაგრძელება იყო. ეს უნდა გესწავლათ სკოლაში და ამაზე თუ ვინ კითხვებს სვამს, რა მოხდა და როგორ მოხდა, ესაა პრობლემა", — განაცხადა პაპუაშვილმა.

შეგახსენებთ, რომ გუშინ, 9 აპრილს, 9 აპრილთან დაკავშირებულ განცხადებაში ოცნების ხელისუფლების პრემიერმინისტრმა, ირაკლი კობახიძემ განცხადება გაავრცელა, სადაც ეწერა, რომ "9 აპრილს უცხოურმა ძალამ განახორციელა ძალადობა ჩვენი თანამოქალაქეების წინააღმდეგ", მან ამ ტექსტში 6-ჯერ ახსენა "უცხოური ძალა" და არც ერთხელ რუსეთი.