"ყვარლის ბაგა" მიზნობრივი ჯგუფებისთვის ღია კარის დღეებს მოაწყობს. ამის შესახებ ინფორმაციას "რძის ლაბორატორია" ავრცელებს.

"ყვარლის ბაგამ" მიიღო გადაწყვეტილება გამონაკლისის სახით მოაწყოს ღია კარის დღეები, რომელიც ჩატარდება მიზნობრივი აუდიტორიებისთვის, მათ შორის:

კულინარიისა და კვების მრეწველობის პროფესიონალები;

სამედიცინო და კვების ექსპერტები;

სოფლის მეურნეობის და სურსათის უვნებლობის სპეციალისტები;

მედიის წარმომადგენლები;

განათლების სექტორი;

მასწავლებლები, მშობლები, ბავშვები და ახალგაზრდები;

საცალო და სავაჭრო ქსელის წარმომადგენლები;

რძის პროდუქტების მომხმარებლები.

დამსწრეებს შესაძლებლობა ექნებათ ადგილზე დასვან მათთვის საინტერესო კითხვები და დაათვალიერონ ფერმა:

პირუტყვის სადგომები – მეწველი ძროხები, ხბოები და უშობელები;

კვება და ლაბორატორია – საცავი ბუნკერები, ინგრედიენტების ხარისხი და შენახვის პირობები;

წველის პროცესი – საწველი დარბაზი, ჰიგიენა და საცავი რეზერვუარები.- სამშობიარო და ახალშობილთა ზონა – როგორ ხდება მცირე ასაკის ხბოების მოვლა.

ყვარლის ბაგა არის რძის წარმოების ევროპული სტანდარტების დამნერგავი საქართველოში. ბაგას ქართველი თუ ევროპელი გუნდის წევრები მზად არიან ამ თემებზე ღიად სასაუბროდ", — წერია განცხადებაში.

შეგახსენებთ, რომ რადიო თავისუფლებამ 1-ელ აპრილს გამოაქვეყნა ჟურნალისტური გამოძიება, სადაც ნათქვამი იყო, რომ ბიზნესმენ ლაშა პაპაშვილის ნედლი რძის მწარმოებელი უდიდესი ფერმა "ყვარლის ბაგა" ძროხებს ევროკავშირში აკრძალული ქათმის ნაკელით კვებავდა.