ბიზნესმენ ლაშა პაპაშვილის ნედლი რძის მწარმოებელი უდიდესი ფერმა "ყვარლის ბაგა" ძროხებს ევროკავშირში აკრძალული ქათმის ნაკელით კვებავდა — ამის შესახებ "რადიო თავისუფლების" მიერ ჩატარებული ჟურნალისტური გამოძიებიდან ვიგებთ.

"ყვარლის ბაგის" რძეს ყიდულობს "სანტე", "სოფლის ნობათი", "აგროჰაბი" და "ყვარლის ბაგის" შვილობილი "რძის ლაბორატორია". 2020 წელს ლაშა პაპაშვილმა კომპანია "ჩირინას" (ბიუ-ბიუ), რომლისგანაც ქათმის ნაკელს ყიდულობდა — სასამართლოში უჩივლა. პაპაშვილი პრეტენზიით მივიდა "ჩირინასთან", რომ მისმა ნაკელმა საქონელი დაუხოცა და 1,65 მილიონი ლარის ზარალი მიადგა, რაზეც "ჩირინამ" პრეტენზიები არ მიიღო. "ჩირინას" განცხადებით, ის ქათმის ნაკელსს სასუქად ყიდდა და არა საკვებად.

2024 წელს, "ქართული ოცნების" ღიად მხარდამჭერმა ბიზნესმენმა, ლაშა პაპიაშვილმა, "ჩირინას" სასამართლო დავა მოუგო და მას 4,7-მილიონიანი ზარალის გადახდა დაეკისრა.

სასამართლო დავა

2020 წელს ლაშა პაპაშვილის კომპანიამ ჩირინას სასამართლოში უჩივლა. სასამართლოს მასალების მიხედვით, "ყვარლის ბაგის" 1 ძროხა დღეში დაახლოებით 6-7 კილო ქათმის ნაკელს ჭამდა (ნამჯაში არეულს).

თავდაპირველად, რუსთავის სასამართლომ ვერ გამოკვეთა საქონლის დახოცვაში "ჩირინას" ბრალეულობა. სააპელაციომ საქმე ხელახალი განხილვისთვის ისევ რუსთავის სასამართლოში დააბრუნა. 2024 წლის მარტში "ყვარლის ბაგამ" რუსთავის სასამართლოდან სარჩელი უკან გაიხმო, ორ თვეში კი იგივე მოთხოვნებით თბილისის საქალაქო სასამართლოს მიმართა.

"ჩირინას" მფლობელი რადიო თავისუფლებას განუცხადა, რომ დავის თბილისში გადატანა ცუდად ენიშნა. მისი თქმით, ეჭვი გაუჩნდა, რომ ძმები პაპაშვილები დავის გადასაწყვეტად ხელისუფლებასთან კავშირების გამოყენებას აპირებდნენ.

2024 წლის დეკემბერში თბილისის საქალაქო სასამართლომ ყვარლის ბაგის საჩივარი დააკმაყოფილა — ყვარლის ბაგამ სასამართლოს წარუდგინა ლაბორატორიული დასკვნები, რომელშიც წერია, რომ ნიმუში, რომელსაც კვლევა ჩაუტარდა, ანტიბიოტიკ ტეტრაციკლინს შეიცავდა. ამ დასკვნაზე დაყრდნობით, თბილისის საქალაქო სასამართლოს მოსამართლემ ჩათვალა, რომ ანტიბიოტიკიანმა ნაკელმა რძეც გააფუჭა და 200-მდე ძროხაც დახოცა, სასამართლომ "ჩირინას" დახოცილი ძროხების საფასური და ახალი ძროხების ყიდვისთვის ბანკიდან აღებული სესხის პროცენტის გადახდაც დააკისრა.

რადიო თავისუფლების ცნობით, სასამართლოს მასალებში დევს სურსათის ეროვნული სააგენტოს ოფიციალური წერილიც, რომ ნაკელში აღმოჩენილი ტეტრაციკლინი არ არის აკრძალული ვეტერინარული პრეპარატების სიაში. ამ ანტიბიოტიკს დღემდე იყენებენ ფერმერები. დოკუმენტებით ასევე ჩანს, რომ ტეტრაციკლინით თავად "ყვარლის ბაგის" ვეტერინარიც მკურნალობდა ძროხებს. "ჩირინას" მფლობელი უარყოფს ტეტრაციკლინის გამოყენებას თავის ქათმის ფერმაში და ამბობს, რომ სხვა მედიკამენტს იყენებდა.

კომპანიების კომენტარი ქათმის ნაკელ-ნაჭამ რძის გამოყენებაზე:

რადიო თავისუფლებამ კომპანიებს, რომლებიც რძეს ყვარლის ბაგიდან ყიდულობენ, ჰკითხა, ამოწმებდნენ თუ არა მიღებული რძის ყველა პარტიას და რამდენჯერ აღმოაჩინეს მასში ანტიბიოტიკი? ასევე, იცოდნენ თუ არა, რომ რძის მიმწოდებელი იმ პერიოდში ევროპაში აკრძალულ საკვებს, ქათმის ნაკელს, იყენებდა ძროხების გამოსაკვებად.

სოფლის ნობათის მფლობელი კომპანიის, "პეპსიკომ" განაცხადა, რომ "მაგ პერიოდის არქივი არ არის შენახული, კანონით, სამწლიანი ვადა ვრცელდება დოკუმენტების შენახვაზე. ზოგადად, თუ რძის ან ნებისმიერი ინგრედიენტის ხარისხი არ შეესაბამება "პეპსიკოს" დადგენილ სტანდარტსა და კანონმდებლობის მოთხოვნას, ჩვენი მხრიდან ასეთი ინგრედიენტი ხარვეზდება და წარმოებაში არ დაიშვება". კითხვაზე, იცოდნენ თუ არა, რომ რძის მიმწოდებელი იმ პერიოდში ევროპაში აკრძალულ საკვებს, ქათმის ნაკელს, იყენებდა ძროხების გამოსაკვებად, "პეპსიკომ" რადიო თავისუფლებას უპასუხა, რომ არა.

აგროჰაბის ცნობით, იმ პერიოდში, როცა რძეს ყიდულობდნენ “ყვარლის ბაგისგან”, არ იცოდნენ, რომ ძროხებს ნაკელს აჭმევდნენ. მათივე თქმით, "აგროჰაბი ყოველთვის, ყველა პარტიაზე ამოწმებს რძეს ანტიბიოტიკზე. დაფიქსირების შემთხვევაში რძეს არ ვიღებთ. შემოწმების შესახებ ამ ხანდაზმულობის რეესტრი არ გვაქვს".

კომპანია "სანტემ" კი სტატიის გამოქვეყნებიდან რამდენიმე საათში განცხადება გაავრცელა. განცხადებაში ვკითხულობთ, რომ 2018 წელს სწორედ "სანტემ" აღმოაჩინა შეუსაბამობა „ყვარლის ბაგის“ რძეში, კერძოდ, ანტიბიოტიკები, რაც საქმეში წარმოდგენილი მასალებითაც დასტურდება. ამ მიზეზით უარი განაცხადა რძის მიღებასა და წარმოებაში მის გამოყენებაზე.

"სანტე" 1997 წლიდან დღემდე უმსხვილესი რძის გადამამუშავებელი კომპანიაა საქართველოში, რომელიც წლის განმავლობაში 20 მილიონ ლიტრამდე რძეს იბარებს და ამუშავებს. თანამშრომლობს საქართველოს ბაზარზე არსებულ ყველაზე მსხვილ ფერმებთან, და გარდა ამისა, ფლობს რძის ჩაბარების პუნქტებს მთელი ქვეყნის მასშტაბით.
"სანტეს" დანერგილი აქვს რძის ხარისხის კონტროლის უმკაცრესი სტანდარტები. მათ შორის არის: რძეში ანტიბიოტიკის შემოწმება, ცხიმისა და ცილის იდენტიფიცირება, რძის მიკრობიოლოგიური ანალიზი.
ხარისხის სტანდარტებთან შეუსაბამობის შემთხვევაში რძე უბრუნდება ფერმას და არ გამოიყენება წარმოების პროცესში. 2018 წელს სწორედ ,"სანტემ" აღმოაჩინა შეუსაბამობა „ყვარლის ბაგის“ რძეში, კერძოდ, ანტიბიოტიკები, რაც საქმეში წარმოდგენილი მასალებითაც დასტურდება. ამ მიზეზით უარი განაცხადა რძის მიღებასა და წარმოებაში მის გამოყენებაზე.
საწარმოში დანერგილი ხარისხის კონტროლის ევროპული და უმკაცრესი შიდა სტანდარტები, ასევე ISO, HACCP არის გარანტია იმისა, რომ რძე, რომელიც შეუსაბამოა ხარისხის სტანდარტებთან, არ გამოიყენება წარმოებაში.
"სანტე" არის კომპანია, რომელიც ყოველთვის აწარმოებს უმაღლესი ხარისხის უსაფრთხო რძის პროდუქტებს მთელი საქართველოსთვის." — ვკითხულობთ განცხადებაში.

პაპაშვილი და "ქართული ოცნება"

2024 წლის 30 დეკემბერს, 4.7-მილიონი სასამართლოს მოგებიდან მალევე, ლაშა პაპაშვილი BMG-სთან ინტერვიუში ლაშა პაპაშვილმა განაცხადა, რომ ბიძინა ივანიშვილი ისტორიაში უნდა შევიდეს, რადგან მან საქართველოს ომი ააცილა.

"ქართული ოცნების დამსახურებაა, რომ მშვიდობა გვაქვს, ეკონომიკა ვითარდება… ქვეყანა მიჰყავს ევროპაში, ვინმე ასე არ ფიქრობს? ...უნდა ვაპატიოთ შეცდომები, ჩვენი წინამძღოლი ვინცაა, უნდა ვაპატიოთ… ბიძინა ივანიშვილი უკვე შევიდა ისტორიაში, დღესვე რომ დაასრულოს მოღვაწეობა… ჩვენს ქვეყანას ომი ააცილა…" — განაცხადა პაპაშვილმა.

ცნობისთვის, 9 იანვარს თეატრის გაფიცულმა ხელოვანებმა, რომლებიც სხვადასხვა დროს იყვნენ პრემია "დურუჯის" ლაურეატები, ბიზნესმენ ლაშა პაპაშვილს თეატრალური პრემია დაუბრუნეს. თეატრალური პრემია "დურუჯის" დამფუძნებელია ლაშა პაპაშვილის "რედიქს ჯგუფი". ხელოვანებმა მისთვის ჯილდოს დაბრუნება სწორედ ამ ინტერვიუს შემდეგ გადაწყვიტეს.