"როცა დასაქმებულთან ხელშეკრულება სრულდება, ვიღებთ გადაწყვეტილებას — ან ვაგრძელებთ, ან — არა. შესაბამისად, გადაწყვეტილება მიიღეს სამსახურების ხელმძღვანელებმა", — ამის შესახებ დედაქალაქის მერმა მედიასთან სამოქალაქო საზოგადოების მიერ გავრცელებული სიის შესახებ ისაუბრა, რომლის თანახმადაც თითქოს თბილისის მერიის სამსახურების უფროსები თანამშრომლებს პოლიტიკური ნიშნით უშვებენ.

კახა კალაძის თქმით, პოლიტიკური ნიშნით ან საპროტესტო აქციებზე დგომის გამო არავის უშვებენ და ამის მაგალითია მერიის ერთ-ერთი თანამშრომელი, რომელიც პარალელურად ერთ-ერთი პოლიტიკური პარტიის წევრია.

"როდის გაგიგიათ, რომ საპროტესტო აქციაზე დგომის გამო, ვინმე გაგვეშვას? ყველაზე კარგი მაგალითი არის ერთ-ერთი პარტიის წევრი, რომელიც დედაქალაქის მერიაში მუშაობს. პოლიტიკური ნიშნით მისი გაშვების სურვილი რომ გვქონოდა, მაგ ადამიანსაც გავუშვებდით. საზოგადოებას არანაირი პოლიტიკური ნიშნით არ ვყოფთ და მითუმეტეს თანამშრომლებს. ვინც გასაშვებია, ყველას გავუშვებთ. როცა ხელშეკრულება სრულდება, ვიღებთ გადაწყვეტილებას - ან ვაგრძელებთ, ან — არა. შესაბამისად, გადაწყვეტილება მიიღეს სამსახურის ხელმძღვანელებმა", — აღნიშნა თბილისის მერმა.

მიუხედავად იმისა, რომ თბილისის მერი, კახა კალაძე ამტკიცებს, რომ პროევროპულ აქციებზე დგომისა, განსხვავებული პოლიტიკური შეხედულების გამო სამსახურიდან არავინ გაუთავისუფლებიათ, თბილისის მერიის არაერთი უკვე ყოფილი თანამშრომელი აცხადებს, რომ მათი გათავისუფლების მიზეზი სწორედ განსხვავებული პოლიტიკური შეხედულებები და საპროტესტო აქციებზე დგომა იყო. ამის მაგალითია, შშმ პირთა საკითხებზე მომუშავე საბჭოს აღმასრულებელი მდივანი, გიგა სოფრომაძე, რომელიც ამბობს, რომ სამსახურიდან პოლიტიკური ნიშნით გაათავისუფლეს.

საზოგადოებასთან ურთიერთობის დეპარტამენტის თანამშრომელი ლანა ქარდავა წერს, რომ ის მერიიდან განსხვავებული აზრის ღიად გამოხატვის, ევროპასთან ინტეგრაციის მხარდაჭერის, აქციებზე სიარულის, დემონსტრანტებზე ძალადობის ხმამაღლა დაგმობის გამო გამოუშვეს.

თბილისის მერიის მედიასთან კომუნიკაციის მენეჯერის თაია მახარაშვილის თქმით, ის სამსახურიდან, "როგორც კონსტიტუციისა და ევროინტეგრაციის მხარდამჭერი განცხადების თანაავტორი და ხელმომწერი პირი, როგორც საჯარო მოსამსახურეთა დამოუკიდებელი პროფესიული კავშირის თანადამფუძნებელი და გამგეობის წევრი და წლების განმავლობაში საკუთარი აზრის ღიად გამომხატველი ადამიანი" დაითხოვეს.